ماما…يعني إيه خادمة؟

بنتي جاتلي في يوم تسألني: “ماما، يعني إيه خادمة؟!”.

أنا: دي يا حبيبتي واحدة بتيجي تساعد ماما في شغل البيت، وبلاش نقول خَدّامة دي، هي مساعدة وده شغلها.

بنتي: بس أنا مش بحب الخادمات يا ماما عشان لونهُم إسود!!

طبعًا أنا ظَهَر عليّا علامات التَعَجُّب والاستغراب! واتكَلِّمت مع بنتي على إننا ماينفعش نقول كده، وإحنا ربِّنا خلق كل واحد بشكل ولون مُعَيَّن، لكن في النهاية المهم مين الكويّس؟ ومين الوحش؟ وهكذا.

الجدير بالذكر إن سبب هذا السؤال هو كلام بعض صديقاتها في المدرسة وتعليقهم على خادماتهم.

المهم الموقف ده خَلّاني فضلت أفكَّر في كيفيّة توصيل فكرة اختلاف الناس للأطفال، واختلاف ألوانهم وأشكالهم، وإنه مايكونش ده وسيلة الحُكْم عليهم، ولقيت أكتر من طريقة عجبتني:

• طريقة البيض:

دي طريقة عجبتني جدًّا، وهي إنك تجيبي بيضة لونها أبيض، وبيضة أُخرى لونها بُنّي، وتِخَلّي أولادك يشوفوها ويلاحظوا إيه الفرق بين البيضتين؟ (الاتنين نفس النوع، والاتنين بييجوا من الفراخ, لكن لونهم مختلف)! بعد ملاحظة الفرق تكسري البيضتين، وتورَّي أولادك إنهم من الداخل متماثلين، وده بالظّبط نفس الحال في البشر.. مختلفين في الشكل الخارجي، لكن كُلِّنا متماثلين من الداخل.

• القصص:

طريقة القصص والحكايات دي مهمة جدًّا، ومفيدة لتوصيل معلومات كتيرة للأطفال بطريق غير مباشر. ومن أجمل القصص في هذا الصَدَدْ هي قصة سيّدنا “بلال بن رباح” مؤذِّن رسول الله (صلّى الله عليه وسلَّم)، وإزّاي كان عَبْد أسود لكن في المنزلة عالي جدًّا، لأن ربِّنا بيفرَّق بين الأشخاص بالتقوى مش بالشكل ولا باللون.

• أغاني الأطفال والكارتون:

زمان وإحنا صغيرين كان فيه أغاني وأفلام عن تقدير أصحاب المهن البسيطة، وفاكرة أغنية كانت عن مين إللي وصلِّنا التورتة، ولازم نشكُرهم إللي هُمَّ الفَلّاح، والطَحّان، واللَبّان، والخَبّاز… إلخ..

فيه كارتونات كتير بتتكَلِّم عن احترام الآخر، فممكن نخَلّي أطفالنا يشوفوه ويعرفوا كمان أهمية الأعمال البسيطة دي.

• مساعدة المساعدة:

لو كان عندك مساعدة (خادمة) في البيت لازم الأطفال يتعَلِّموا إنهم مايعتمدوش عليها اعتماد كُلّي. يعني بعد اللِعْب يرتِّبوا لِعَبْهُم، لو عايزين حاجة منها لازم يطلبوها بأدب زي: “من فضلِك”، و”شكرًا”، ولازم الأُم كمان تُظْهِر احترام المساعدة، ده لإن الأطفال بيقَلِّدوا الأهل، فلو لقوا احترام هَيحترموها، لو الأب أو الأُم بيعاملوها بعدم احترام.. الأطفال هَيعملوا زيّهم.

وفي النهاية.. أكثر شئ بيوصَّل للأطفال معلومات مختلفة هو الكلام والمناقشة. كل ما نتكَلِّم مع ولادنا أكتر ونوسَّع مداركهم، كل ما هَيفهموا أكتر ويتعَلِّموا. ممكن نحِسّ إن إللي بنقوله مش بيأثَّر فيهم، أو نقول هَمَّ دايمًا بيمشوا وبيحِبّوا يقولوا للأُم “لأ” ويعاندوا، لكن في النهاية كل الكلام ده بيتزِرِعْ بداخلهم، وبيطلع في الوقت المناسب، ووقتها هَتنبهري إن فعلًا ولادك بيتعَلِّموا منِّك، وبيحفظوا إللي بتقوليه ليهم، وبيطَبَّقوه كمان.

أمل فاروق

 

مواضيع أخري اخترناها لك:

8 أشياء يفتقدها أبناؤنا

كيف ربي “ستيف جوبز” مؤسس آبل أبناءه؟

لا أحب الجلوس مع ابنتي ماذا أفعل؟

ازاي أخلي ابني يسمع الكلام؟

 

photo credit: Bigstock