من النهاردة هبطّل أشتكي
000.
فيه ناس بتنفجر.. فيه ناس بتشتكي طول الوقت.. وفيه ناس بتحوّل طاقة الإحباط والزعل إلى طاقة لتحقيق النجاح.
طبعًا كُلّنا جرّبنا أول طريقتين..
في أول طريقة، بنقعد نضغط على نفسنا، ونغلي من جوّانا زي برّاد الشاي، وفي الآخر طبعًا بننفجر، ولمّا بننفجر، بندمّر نفسنا، وبندمّر علاقتنا بالناس إللي حوالينا.
في الطريقة الثانية بقى، بنرفع شويّة غطاء البرّاد؛ علشان ننفّس عن الغليان إللي جوّانا، فبنشتكي طول الوقت، علشان ماننفجرش؛ وده بيخلّينا عبيد لمشاكلنا، وبنخلّي حياتنا يتحكّم فيها المشاكل والظروف، وكل ما نتكلّم في المشكلة، بنحس بيها، وبنعيش فيها أكتر، وبنقوّي جذورها جوّانا أكتر، من غير ما ناخُد موقف إيجابي، ونلاقي حل.
إذًا مافيش قُدّامنا غير إننا نجرّب الطريقة الثالثة، ونحوّل طاقة الغليان إلى طاقة دافعة للأمام زي قطر البُخار.
الخطوة الأولى لتنفيذ الطريقة دي، هي إننا نبطّل نشتكي تمامًا.. طبعًا دي حاجة صعبة جدًّا مش أي حد يقدر عليها.. أنا بقى هقولِّك إزّاي تقدري تعمليها:
- جرّبي ماتشتكيش لحد خالص لمدة معينة.. أسبوع مثلًا أو شهر (الشكوى لغير الله مذلّة).
- لمّا تبقي خلاص مش قادرة تسكُتي، وعايزة تنفّسي عن إللي جوّاكي، اكتبي إللي مضايقك في ورقة.
- فكّري في الحل.
- اعملي إللي إنتي عايزاه؛ زي إنك تواجهي شخص معين، وماتقابليش شخص معين.
لو نجحتي في الخطوات دي، وبطّلتي تشتكي، هتلاقي نفسك في اتجاهات جديدة وجميلة، و مش هتلاقي موقف واحد مالوش حل، أو صعب التعامل معاه في الدنيا.. كوني زي القطر، ماتخلّيش حاجة توقّفِك.
الصورة: Neal Fowler
مواضيع مختارة:
9 أشياء تحتاجين لاضافتها لحياتك
