فعلًا.. دايت (رجيم) إيه إللي إنت جاي تقول عليه.. إنت عارف قَبلَه معنى الدايت إيه؟.. هههههه.. ده الإحساس إللي بيصيب ناس كتير أمَّا تشوف النظام الغذائي إللي دكتور الدايت حاطُّه.. تبقى ماسِكْ الورقة مُذبهل، وعلى طرف لسانَك تقول للدكتور: “حضرتك هي الورقة دي الفطار بس، ولّا فيه حاجة تانية؟!”.. بس الذهول سببه مفاهيم خاطئة عن التغذية و الرجيم الصحي بشكل عام.. زي مثلًا:
- الرياضة والآيروبكس دول جُزْء من برنامج التخسيس، يعني إللي عاوز يخسّ هو اللي يشترك في رياضة زي كده.. للأسف ده أوّل مفهوم غلط! إحنا إللي مش بنلعب رياضة إلّا بعد فوات الأوان، أو عشان نعالِج السِمنة إللي كان ممكن من الأوّل نسيطر عليها لو بنلعب رياضة، والوقاية خير من العلاج.. وتلاقي في الشعوب المُتقدّمة، الرياضة -أيًّا كان شكلها- جُزْء من البرنامج اليومي للفرد من غير لا سِمنة ولا حاجة. هناك، الناس بينزلوا يمشوا، أو يجروا، يروحوا الجيم، أو يلعبوا أي رياضة، أو حتى بعض التمرينات في البيت، المهم إن الرياضة جُزْء من نظام حياتهم، وعشان كده صحّتهم أفضل.
- لعب الرياضة لازم في آيروبكس كلاس أو في الجيم.. أهو كده إنت بتحُط العُقدة في المنشار، وممكن جدًّا تكسِّل تنزِل، أو تلاقي نفسك ماتقدرش على مصروفات الاشتراك؛ فبالتالي مش هتلعب رياضة.. لكن لأ.. ممكن جدًّا تلعب تمرينات بسيطة في البيت لمُدَدْ قصيرة كل يوم.
- الدكتور هيقلِّل كميّة الأكل عشان تخسّ.. دي جُملة مش مظبوطة أوي.. في الحقيقة الدكتور غالبًا بيحذف كل الأطعمة والمشروبات الضارّة، إللي بنمنع الأطفال الصغيرة منها زي؛ المياه الغازية والحلويات الكتير.. يعني أصلًا من غير دايت المفروض تسيطر على كمية الحلويات إللي داخلة جسمك، سواء عاوز تخسّ أو لأ، لإن الأمر مُرتبط بحاجات تانية زي؛ صحّة أسنانك، أو الوقاية من مرض السُكري مثلًا.
- الدايت يعني بلاش سَمنة وزبدة في الأكل.. برضو نفس الشئ.. الموضوع في الأساس إن الدكتور هيخلّيك تاكُل أكل صحّي أكتر، وبالتالي لازم تقلّل جدًّا السَمنة والزبدة في الأكل، عشان صحّتك قبل ما يكون عشان وزنك.
- الميَّه مابتفرقش في حاجة.. غلط جدًّا.. طبعًا بتفرق، ولو مش بتشرب ميَّه كفاية مش هتحرق، وبالتالي مش هتخسّ، ده غير برضو إن المفروض عشان صحّتك وبشرتك لازم تشرب ميَّه كفاية.
- الأكل الصحّي طعمُه وحِشّ.. لا مش هو إللي طعمُه وحِشّ، إحنا بس إللي مش واخدين على الأكل الصحّي، وإن الموضوع كُلُّه في الآخر تعوُّد.. يعني مثلًا؛ كُل واحد شايف إن أكل مامتُه حلو، لإنُّه اتربّى عليه.. ممكن حَدّ تاني ييجي يدوقُه يلاقيه ناقص ملح، أو حادِق زيادة، أو ناقصُه توابل، وهكذا.. إذًا الموضوع كُلُّه موضوع تعوُّد، ده غير إن فيه وصفات كتير دلوقتي طعمها حلو وسهلة.
- بلاش نستخدم علي قد ما نقدر السكر في الشاي..الموضوع مش موضوع دايت.. السُكَّر والملح والدقيق بيسمّوهم (السموم البيضاء)، لإنهم بيضرّوا الجسم بطريقة أو بأخرى.
الخُلاصة.. إن في أغلب الحالات إللي إحنا بنقول عليها: “دايت عشان نخسّ”، ما هو إلّا نظام لحياة صحيّة.. وفعلًا.. إنت عارف قَبلَه معنى الدايت إيه؟!
فريق عمل مج لاتيه
مواضيع أخري اخترناها لك:
تجربتي في انقاص وزني 20 كيلو خلال 4 شهور!
photo credit: Bigstock
