تعرفي إزّاي إن ابنك سخن؟

قَبِّلي أو المسي جبينه.. لو حسِّتيه سُخْن عن الطبيعي غالبًا إنتِ صَحّ، لكن لازم تتأكّدي بترمومتر. الأطباء في (الأكاديميّة الأمريكيّة للأطفال) اتفقوا على أن درجة حرارة الطفل الصحيح هي (36 – 38) درجة.. لو ابنك حرارته مَعَدّية الرقم ده يبقى كده مريض.

 

تعرفي إزّاي إذا كان ارتفاع الحرارة ده عادي ولّا خطير؟

• أهم عامل هو نشاط الطفل وحركته. قراءة الحرارة مُهِمّة بس مش هي العامل الوحيد لمعرفة مدى خطورة الوضع.
• الحرارة إللي ماتمنعش ابنك من الأكل واللعب غالبًا مش نذير إنها حاجة خطيرة، لكن إللي تهَمِّدُه عن اللعب هي إللي تخَلّيكي لازم تركّزي معاه.
• خُدي بالك إن طبيعي درجة حرارة الطفل تزيد مع اللعب، وكمان دايرة الجسم العادية درجة الحرارة فيها بتعلى بعد الضُهْر وبالليل، وبتقل في منتصف الليل والصُبْح بدري. عشان كده معظم الدكاترة بيجيلهُم مكالمات بخصوص الحرارة في وقت بعد الضُهْر وبالليل ده.

 

إمتى تتّصلي بطبيب ابنك/بنتك؟

أهم عامل هو شكل ابنك إيه وحركته عاملة إزّاي؟ لو شكله كويّس وبيشرب سوائل عادي، مفيش داعي تتّصلي بالطبيب إلّا لو فات 24 ساعة والحرارة مانزلتش أو الحرارة عالية جدًّا.

الأطباء بيقترحوا إنك تتواصلي مع الطبيب لو درجة الحرارة معاها عَرَض من الأعراض الآتية:

• فُقْدان شهيّة، أو كُحّة، أو وجع في الأُذُن، أو عدم القدرة على النوم، أو قئ، أو إسهال.
• شكل الطفل شاحب، أو وِشُّه أحمر أوي ومزنهر، أو بيتبَوّل أقل من الطبيعي.
• عند ملاحظتكِ لطفح جلدي غير مُفَسَّر، وده ممكن يبقى دليل على مشكلة لو كانت مع حرارة.
• لو ابنك عنده صعوبة في التنَفُّس أو بيتنَفِّس أسرع من الطبيعي حتى بعد ما تنَضّفي أنفه لإن ده ممكن يكون التهاب رئوي.

 

عبر الهاتف, الطبيب هيتصرف إزّاي؟

لو ابنك مصحصح ومِرَكِّز، وبياخُد سوايل، ومفيش أي مؤشِّرات لمرض تاني غالبًا الطبيب هيطلب منك إنك تنتظري 24 ساعة وبعدين تجيبيه يشوفه، لإن الحرارة هي أول علامة للمرض، والطبيب ممكن مايعرفش المرض إيه بالظبط لو روحتيلُه بابنك وهو في بداية المرض خالص! وغالبًا الطبيب هيدّيلُه مُخَفِّض للحرارة (وده يعتمد على حالة ابنك).

لكن لو فيه أي علامة أخرى لمرض تاني غالبًا الطبيب هيطلب منك إنك تزوريه عشان يكشف عليه ويشوف المرض إيه بالظبط؟

• لو الحرارة هي من عوامل الدفاع عن الجسم في حالة المرض، هل الأحسن إن إحنا نقَلِّلها ولّا نسيبها تواجه المرض وتساعد الجسم في التخَلُّص منه؟
• بما أن الحرارة هي جزء من دفاع الجسم ضد البكتيريا والفيروسات، بعض الأبحاث بتبيّن إن الحرارة ممكن بالفعل تساعد الجسم على مُحاربة الإصابة (البكتيريا والفيروسات تفضِّل البيئة إللي في حدود 37 درجة). بالإضافة لكده فالحرارة بتِدّي إشارات للجسم لصُنْع مزيد من الكُرات البيضا والأجسام المُضادة لمحاربة العدوى.
• بس فيه مشكلة وهي إن لو الطفل مش مرتاح في الحرارة (قِلّة أكل أو شُرْب أو نوم أو لعب) يبقى ساعتها لازم ننَزِّلها لإن صعب إن هو كده يتحَسِّن. لو الحرارة مش مأثّرة عليه.. كل إللي محتاجة تعمليه إنك تدّيلُه سوايل كتير لتَجَنُّب الجفاف، وخَفِّفي عنه ملابسه وماتغطّيهوش وهو نايم بطبقات كتير.

 

إيه الأدوية الآمنة إللي ممكن أدّيها للطفل لخفض الحرارة؟

• الأدوية التي تحتوي على باراسيتامول أو بروفين.
• خُدي بالك من وزن طفلِك لإن ده إللي هيحَدِّد الجُرعة المناسبة له، وهتلاقي الجُرعة مكتوبة في منشور الدواء. استعملي أداة قياس الجُرعة إللي بتيجي مع الدواء أو حُقْنة الفَم عشان تتأكّدي إنك إدّيتيلُه الجُرعة المظبوطة.
• إعطاء الطفل خافض للحرارة أكثر من الجُرعات المُحَدَّدة ممكن يتَسَبَّب له في مشاكل عديدة، فماتعدّيش أقصى جُرعة.
• بالنسبه للباراسيتامول بتِتّاخِد كل أربع ساعات (يعني أقصى جُرعة هي خمس مرات في اليوم) أما البروفين فأقصى جُرعة ليه هو أربع مرات في اليوم (يعني كل 6 ساعات).
• ماتِدّيش طفلِك أي دواء يحتوي على الأسبرين.
• تحذير أخير: لو ابنك بياخُد دوا للكُحّة أو للبرد ماينفعش تِدّيلُه أدوية خافضة للحرارة إلّا بعد استشارة الطبيب، لإن أدوية الكُحّة والبرد ممكن تحتوي على مواد خافضة للحرارة ويبقى إنتِ كده بتِدّيلُه أكتر من الجُرعة المناسبة له.
• وعلى كُلٍّ ينبغي مراجعة الطبيب حتى يُحَدِّد الجُرعات المناسبة لطفلكِ.

 

وسائل أخرى لخفض حرارة الطفل:

• استخدمي ماء عادي مع فوطة أو شاش، وبَلِّليها بالماء ثم ضعيها على رأسه.
• تجَنّبي استخدام الماء البارد، واعطيه حَمّامًا بمياه فاترة.
• تحذير: تَجَنّبي استخدام الخَلّ أو الكحول تمامًا، لإن ذلك قد يخفض حرارة الطفل سريعًا نتيجة امتصاص الجلد له مِمّا يؤدّي لرَدّ فعل عكسي داخل الجسم وهو محاولة رفع درجة الحرارة الداخلية.

ليه حرارة ابني/بنتي مابتنزلش؟؟

• الأدوية الخافضة للحرارة بتقَلِّل الحرارة، ولكنها لا تعالج المرض الحقيقي المُسَبِّب لارتفاع الحرارة، لذلك لا بُدّ من تطهير الجسم تمامًا من المرض حتى تستقر الحرارة وده ممكن ياخُد من يومين إلى 3 أيام.
• بعض الأمراض كالإنفنونزا ممكن تاخد 5-7 أيام، ولو الطفل اتعالج بمُضادات حيويّة ممكن تاخُد معاه 48 ساعة فقط حتى تنخفض الحرارة.

ابني عنده حرارة ومفيش أي أعراض لأي أمراض تانية.. إيه السبب في كده؟

• لو الحرارة مش معاها رَشْح، ولا كُحّة، ولا قئ، ولا إسهال.. اكتشاف السبب بيبقى صعب !
• فيه إصابات فيروسيّة ممكن تسَبِّب حرارة من غير أي أعراض أخرى، زي مرض اسمه (الروزلا) ده بيبقى درجة حرارة عالية جدًّا لمُدّة 3 أيام وبعدين بيظهرعلى الجِلْد طفح زهري خفيف.
• أمراض خطيرة تانية زي التهاب السحايا، أو التهاب المسالِك البوليّة، أو البكتيريما (وهو تجَرثُم الدم أو وجود بكتيريا في مجرى الدم) ممكن ترفع درجة الحرارة من غير أي أعراض أخرى.
• لو طفلِك بيعاني من الحرارة أكتر من 24 ساعة لازم تتواصلي مع طبيب سواء كان عنده أعراض أو ماعندوش.

 

إعداد عهد شاهين

 

مواضيع أخري اخترناها لك:

12 نصيحة لزيادة المناعة

الشعر الأبيض عند الأطفال

عالج ابنك حتي يصل الطبيب (مجموعة مواضيع متنوعة تخص كل ما يتعلق بصحة أبنائك)

صديقتي الأم (مجموعة مواضيع تحوي كل ما تحتاجين معرفته منذ الولادة)

 

الصورة: bigstock