نوبة غضب

 

كتير أوي من الأولاد الطبيعين واللطاف جداً بيدخلو في نوبه غضب لأن دي طريقتهم المثالية في الانفعال عشان يعبروا عن احساسهم بالكبت أو الغضب, فتبصي تلاقيهم بيعملوا سرينه فظيعه اللي هي الصريييخ المزعج طبعا ً, وممكن ترفيص أو يترموا على الأرض, شوية مناظر بتخلي الواحد في نص هدومه أما بتحصل قدام الناس.
المهم يا تري ليها علاج ؟ .. ده أكيد, لأنك ممكن تقلل من عدد مرات النوبات اللي بيعملها الطفل بس أهم حاجة إنك متضعفيش أو تتراجعي قدام أي ضغط أو تتنازلي لمطالب طفلك, ولازم تكوني صبورة جدااااااااا لحد ما يبطل التصرفات دي, وبعدها بينيله إنك معجبة بيه لأنه اتمالك نفسه وسكت.

في ملاحظه كده لو كان في نوبه عياط متكرره ودوريه ده مش نوبه غضب وليها علاج بس بطرق مختلفه ولازم تستشيري اخصائي اذا كانت بمعدل مرتين او ثلاثه يوميا .

ازاي بقه اعمل وقايه من موضوع نوبه الغضب ده؟

1. لازم نعلم ابننا ازاي يعبر عن نفسه في حاله الغضب: يعني ممكن مثلا نبين للطفل احنا ممكن نعمل ايه لو اضايقنا وازاي نعبر عن المضايقه ده مثلا او كسرت ماما طبق فبدل ما اصرخ ممكن افكر اشتري واحد او اغير مكان الاطباق الي مكان امن اكتر المهم اننا نقول للطفل انا متضايقه بس ده مش مشكله كبيرة وهحاول اصلح الموضوع وافكر في حل بديل وده معناه اننا بنعلم الطفل طريقه بحث عن حلول ممكنه بدل ما يستسلم للصراخ.
2. مديح الطفل والاطراء عليه: يعني لما يكون الطفل هادي وبيتصرف بشكل كويس احاول اخليه ياخد باله وامدحه ومثلا لو طلب مساعده مننا في حل لعبه معقده لازم نهنيئه ونقول انا فرحانه انك طلبت مساعدتي بدل ما تصرخ وممكن نقول انا فخورة بيك لانك قدرت تحافظ على هدوءك.
3. بلاش نسيب اولادنا يلعبوا علطول لوحدهم: ممكن قوي الطفل يفهم انه بيتساب لوحده كتير علشان هادي وده بيضطره انه يصرخ وهو بيلعب بس علشان يجيب بابا او ماما جنبه.
4. بلاش نستنى لما يطلبو المساعد: يعني لو قابلتهم مشكله في اللعب او الاكل بلاش نستنى كتير ونبدأ نتدخل ونحاول نوجهه لطريقه حل ونسيبه يكمل.

 

طيب بالفعل الطفل عامل قلق وصريخه مش بنستحمله وكمان بيسبب لنا احراااج كبير في الشارع وقدام الناس نعمل ايه؟ اكيد فيه حلول ومنها:

1. تجاهل الطفل عند نوبه الغضب:

لما يبدأ الطفل بالغضب بلاش نعمل اي حاجه علشان نثبت له ان مش ده الطريقه الي ممكن يلفت انتباهنا بيها ولا ممكن نلبي له طلباته وعلشان كده من الافضل اننا نبعد عن الطفل وقت ما يبدأ في النوبه او على الاقل نديله ظهرنا او ندخله غرفته اما لو حاول يتصرف بعنف مع نفسه او مع الي حواليه ممكن قوي نحطه في العربيه او مكان امن ومنبصش ليه لغايه ما يهدى ونحاول نشغل نفسنا باي حاجه.

 

2. نحاول نعامل الطفل بطريقه حازمه:

مهما كان الصراخ عالي او الضربات قويه لازم نكون حريصين اننا مسيطرين على الموقف تماما ونطبق القواعد بتاعتنا بكل حزم ولازم الطفل يفهم انه مش ممكن يحصل دايما على الي يطلبه وقت ما هو عايز ومنها الطفل بيتعلم ازاي يكون واقعي واحنا ازاي نكون واقعيين ويفرق بين سلوك مقبول وسلوك غير مقبول.

 

3. نحاول نحافظ على هدوءنا على قد ما نقدر:

لازم نقول لنفسنا ان الموضوع بسيط وسهل واننا قادرين نسيطر على الطفل ونعلمه ازاي يعرف يسيطر على نفسه ونفهم ان الطفل بس بيحاول انه يربكنا علشان يوصل للي هو عاوزة وعلشان كده لازم نحافظ على هدوءنا ونسيطر على نفسنا ونتجاهل الطفل.

4. لازم نهنيء الطفل:

اول ما نلاقي الولد سكت لازم نطري عليه فورا علشان قدر انه يسيطر على نفسه وبعدها ممكن نشاركه في لعبه او اي حاجه هو بيحبها وممكن نقوله اننا بنحبك بس مش بنحب الصراخ هنا هيفهم ان سكوته خلانا نهتم بيه عكس صراخه الي كنا متجاهلينه فيه.

 

5. نشرح للطفل اي تغيير في القواعد الي بينا:

يعنى مثلا لو مرة ابنك طلب منك تجيبله لعبه وانت كنت رفضت تجيبهاله قبل كده لازم تشرحله ليه غيرت القاعده معاه وتقوله فاكر المرة الي فاتت كنت هنا وطلبت اللعبه وبدأت في الصراخ … بس ممكن قوي تاخد اللعبه لو تصرفت بشكل كويس وانت جانبي وهنا هيفهم ان الصراخ هو الي منعك من شراء اللعبه وسكوته وحسن تصرفه هو الي خلاكي تغيري رايك وتشتريها له.

 

وبعد النقاط البسيطه ده لازم اوضح انه في بردو حاجات لازم نتجنبها زي :

 

1. تجنبوا تشرحوا وتحاولو تهدوا الطفل:

كده وهو في الحاله ده بنضيع وقت لان مش هينفع.. ازاي يتخلى عن الدور ده وهو بطل القصه وهيعرف انه ضاغط عليكي ومش هيسكت.

 

2. بلاش نستسلم للغضب ونخليه يسيطر علينا:

امسك اعصابك وبلاش تفقد الهدوء لان هو ده مفتاح علاج الطفل.

 

3. بلاش نهين الطفل:

يعني مثلا الطفل وقت النوبه بلاش نقوله انت مش مكسوف من نفسك او اي كلمه تانيه لانه ممكن يشعر بالاهانه وهيتولد انطباع سبئ وانه كدا كده ميستاهلش الي هو عاوزة.

 

4. بلاش التذكرة بالنوبات السابقه:

لازم نتجنب نفكر الطفل بنوبه غضب فاتت لان ده هيخلي سلوكه اكتر اهميه ويزود من احتمال تكرارها.

 

5. بلاش نعاقب الطفل لما يغضب:

يعني بلاش نتجاهل مثلا الطفل بعد ما يبطل صراخ لانه ممكن يدخل في نوبه تانيه علشان يستعيد انتباهك مرة تانية وبلاش نحسس الطفل انه مش محبوب او ان قيمته عندك قلت ولكن تبينوا ان المشكله في الصراخ.

 

نصيحه اخيره اذا دخل ابنك في نوبه صراخ ممكن قوي تقول انا عارف انك عاوز كذا بس علشان نتكلم لازم تهدى ونشوف حل وتبدأ تتجاهل الطفل.

 

رنا رضا

مدربة و باحثة تربوية