انت عصبيه؟

 

 

أنتِ عصبية؟

بتحسي إن الدم بيغلي في عروقك لما حد يكسرعليكِ بالعربية؟ أو لما ابنك يقرر أنه مش هيتعاون معاكِ و لايسمع كلامك في موقف معين؟؟ ضغوط الحياة الكثيرة ( كالمواعيد المتأخرة ، العمل ، أعمال البيت ، المشاكل الزوجية والأسرية ، أحوال البلد المتدهورة ، أحلامك دنيويا و دينيا .. إلخ) بتحط الأم تحت طائلة العصبية الشديدة ، وتلاقي الطفل جاي في كم الضغوط دي عشان يستفز أخته الصغيرة أو يقعد يزن على حاجة ملهاش لزمة في نظرك .. ابنك ممكن يكون بيثيرغضبك جدا ولكنه ليس مسؤولا عن رد فعلك ! أي موضوع بيخليكي تحسي أنك هتنهاري غالبا بيبقى موضوع عميق و له جذور من أعوام عديدة ، كلنا بندخل مرحلة التربية برواسب سلبية من طفولتنا احنا و أطفالنا بيتعرضوا للرواسب بتاعتنا دي. المفروض أن احنا نبقى متوقعين كآباء ان أبناءنا هيتصرفوا بطريقة تخلينا عايزين ننط من أي بلكونة ، و مسؤوليتنا كآباء و أمهات ناضجين أن احنا نتحكم في نفسنا في المرحلة دي!

الغضب شعور طبيعي لأن ربنا خلقنا بيه ، بس الفكرة كلها ازاي تحوّلي الشعور السلبي ده لشعور إيجابي ؟

أولا: استعيني بالله وعليكِ بكثرة الدعاء أن يهديكِ الله لأحسن الأخلاق و أن يرزقكِ الصبر و الحلم والأناة ، وأن يرزقكِ الحكمة في تربية أولادك.

ثانيا: أن يكون لديكِ إرادة حقيقية للتغيير, واعرفي أن الموضوع مش طبع ولا حاجة وممكن تغييره فعلا كما قال رسول الله صلى الله عليه وسلم “:إنما العلم بالتعلم و إنما الحلم بالتحلم ومن يتصبر يصبره الله” رواه البخاري و مسلم.

ثالثا: شدي الكوبس .. العد من واحد إلى عشرة مش للصغيرين بس .. خدي نفس عميق و عدي لعشرة قبل ما تتكلمي ، وممكن تبطئي كلامك عمدا عشان تهدي ، أو ممكن تسيبي المكان خالص لحد ما تهدي.

رابعا: عبري عن مشاعرك بعد ما تهدي مباشرة .. بعد ما تنتهي ثورة غضبك، عبري عن مشاعرك بمنتهى الوضوح و الدقة ، حاولي تتكلمي عن الأمور اللي ضايقتك من غير ما تؤذي مشاعر اللي حواليكي أو تحاولي تسيطري عليهم.

خامسا: مارسي التمارين الرياضية .. لو حاسة أنك قربتي تنفجري من الغضب ، حاولي تنزلي تتمشي شوية أو تمارسي أي رياضه بتحبيها ، الرياضه بتساعد المخ أنه يفرز مواد معينة تسبب السعادة و تخليكي تحسي أنك مرتاحة وأعصابك هادية أكتر من قبل التمرين.

. سادسا: فكري قبل ما تتكلمي .. وقت الغضب سهل أنك تقولي حاجه تخليكي ندمانة بعد كده .. خدي ثواني قبل ما تتكلمي تجمعي فيها أفكارك وخلي اللي مشترك معاكي في المشكلة يتعلم منك و يعمل نفس الحاجة .. جربيها .. هتحسي انك بقيتي تراعي مشاعر الناس أكتر بكتير.

سابعا: حاولي تفكري في حلول للمشاكل اللي بتثيرغضب .. بدل ما تصبي كل همك في ايه اللي بيضايقك و تركزي عليه ، دوري على حل ؛ أوضة ابنك منعكشة و كل ما تشوفيها تتجنني؟؟ اقفلي الباب عشان متشوفيهاش ، جوزك بيجي ع العشا متأخر كل يوم؟؟ أخري وقت العشا شوية أو اتفقوا على يوم في الإسبوع تتغدوا بدري  ..خططي و نظمي و استخدمي الورقة و القلم عشان تحلي المشاكل المتكررة.

عهد شاهين