كتبت نورا كمال:
الضرب طبعا شئ اساسي بيظهر مع وجود الطفل سواء مع اخواته أو لما يبدأ يحتك بالعالم الخارجى ومع دخول المدرسة بيبقى كارثي! …. خصوصا للناس اللي عاوزة تربي أولادها بطريقة سوية …. طبعا من مؤثرات ضرب الأهالي للأطفال مش بس التأثير السلبي على شخصيته لكن كمان بيزيد عند الطفل رد الفعل العدواني تجاه الأطفال الأخرين فى طريقتين فى الغالب المتبعين مع موضوع الضرب وللاسف تأثيرهم سلبي:
- الطريقة الأولى : اللي يضربك اضربه! …. الجملة التي دمرت أجيال, مشكلة الأسلوب ده إنه مش بيقدم حل للطفل أنه يفكر بعقله لما يواجه مشكلة ولا يفهم الطرف اللى قصاده بيؤذيه ليه يعنى أحيانا بيكون الطفل أصلا هو اللي بادئ المشكلة مثلا بأنه خطف حاجة طفل تاني وفالطفل التانى بيرد عليه بالضرب … يبقي الطفل مش قاصد يضرب ابنى أو أنه طفل شرير هو بيدافع عن حاجته. مشكلة الأسلوب ده كمان بيتطور مع الطفل لحد ما يكبر و بيعدي مرحلة الضرب بس بيتحول لحاجه من اتنين … اما شخص عنيف غير متسامح عاوز ياخد حقه من أى حد يزعله وفى الغالب بيغلط لانه متعودش يفكر فبيتسرع بالرد فطبعا بيغلط… أما لو هو حساس أصلا ممكن مينامش من كتر الزعل لو معرفش يرد أو ياخد حقه وده هيتعبه فى حياته لأنه مش هيعرف ياخد حقه طول الوقت…
- أما الطريقة الأخري فهي على النقيض وهو: قوله ربنا يسامحك … وده هدفه نبيل بس للأسف مش بيعود على الطفل بنتيجة ولا بيدى حل لمشكلته اللى واجهها …. هو اتضرب دلوقتي فلازم يفهم ليه اتضرب وكمان يعرف أنه لو مردش الاساءة هو اللي هيتكافئ من ربنا وياخد أجر مش الطفل اللي أذاه الي عاوزينه يقوله كمان ربنا يسامحه… وده بيطلع انسان ماشي جنب الحيط مش بيعرف يطالب بحقه ولا يواجه مشاكله …كمان فى السن الصغير اللي مش فاهم الغيبيات لسه بيحس أن ربنا معملهوش حاجة فى مشكلته..
طيب ايه الحل؟؟ الحل ببساطة اننا أولا نتكلم مع الطفل ونفهم مشاعره ونكلمه عن مشاعرة السلبية ونتفهمها ونتعاطف معاها … مع أننا نعلمه الدفاع عن نفسه يعنى لو حد ضربك امسك أيده من الرسغ وقله لأ متضربنيش أو مش من حقك تضربني…. ولو هو طفل صغير سنتين أو أقل يتعلم الأسلوب ده من البيت الأول ويطبق عليه … الطفل فى السن ده بيستكشف ويضرب الأب والأم … الصح أنهم يمسكوا إيده بهدوء ويقولوا له لأ متضربش ماما/ بابا … هو لا شعوريا هينفذ ده مع أول مواجهة ليه مع حد بيضربه …. كمان لو هو أصغر من الطفل اللى بيضربه يبقي ممكن يدفعه بعيد عنه كنوع من أنواع الدفاع عن النفس ويوصل رسالة للطفل اللى بيعتدى عليه إنه مش هيسكت ويعرف ياخد حقه بس هو متسامح ومش مؤذى … كمان يبلغ الشخص البالغ الموجود سواء مدرسة أو مشرفة وطبعا الأب والأم لو موجودين…
اخر نقطة ضرب الإخوات لبعضهم بيجنن الأمهات ويفضلوا يفضوا فى معارك …. صحيا لنفسية الأطفال سيبيهم يتدربوا فى بعض ده تدريب عملى لمواجهة الحياة وهما فى الأخر بيحبوا بعض وهيتصالحوا وهتطلعى أنتى الي غلطانه لو ضربتى حد منهم علشان خاطر التانى … بس طبعا عاقبيهم هما الأتنين وقوليلهم إنك زعلانة منهم وإنهم هما الأتنين غلطانين علشان يعرفوا إن الاسلوب ده مرفوض ومش هيحقق مكسب لأى حد منهم على حساب الأخر … بس لما يبدأو خناق اعملي نفسك أحيانا مش واخده بالك.
Photo Credit: Bigstock
مواضيع أخري اخترناها لك:
اترك تعليقاً
يجب أنت تكون مسجل الدخول لتضيف تعليقاً.