كتبت يمني جاد:
كيان اختار انه يكون فعال فى المجتمع , فريق متميز و فريق روحه حلوة .. ارسم حلمك اضافة انك تقرأ عنهم و تعرفهم..
وجهنا اسئلتنا للأستاذة ميار جمال , مسئولة السوشيال الميديا .
البداية , ليه ارسم حلمك ؟ ليه الاسم ده بالتحديد ؟
عشان فعلًا المشروع بيرسم أحلام الأسر المتعففة بإيديهم.. أحلام وحياة أسر كتيرة أترسمت وبدأت مع بداية المشروع اللي كان سبب كبير في بناء حياة مستقرة ليهم، بعد مفاوضات كتيرة ده أكتر اسم استقرينا عليه.
ازاى ارسم حلمك بدأت؟
البداية كانت فكرة جت لأحد مصممي الجرافيك (الباشمهندسة حنان الشافعي) إن إحنا هنعمل منتجات بسيطة كتمويل لباقي المشاريع “حاجة موسمية” كان وقتها مشاريعنا استهلاكية فقط للأسر، بعدين حسينا إن ده ممكن يكون مشروع دائم بإيدي أسرة من عندنا وبدأنا نشتعل علي الموضوع بقي.
فاكرين اول منتج, اول حالة “ارسم حلمك ” كانت جزء منها ؟
طبعًا.. أسرة أم آية هي اول اسرة اشتغلت علي الموضوع ولسه مستمرة معانا وهي من أكفأ الأسر اللي شغالة علي البلوك نوت والشنط الورقية، أول منتج كان (عندي حلم ومش هسيبه) .. مش بس عشان له علاقة بإسم مشروعنا بس كمان عشان كان الحلم قدام عنينا طول الوقت وكان عندنا إصرار انه يوصل لكل الناس.
مبادرة ارسم حلمك – كيس ورق
Photo credit: Facebook.com/Ersm7lmk
مبادرة ارسم حلمك – بلوك نوت Photo credit: facebook.com/Ersm7lmk
ايه بيميز فريق ارسم حلمك ؟
تميز فريقنا نابع من تميز المنتجات، أي متطوع جديد بينضم لأسرة الفريق مبيكونش محتاج تدريبات كتيرة بسبب حماسه وإيمانه الشديد جدًا بفكرة المشروع، علي عكس اي مؤسسة تانية بتحاول تتطور الإنتماء داخل فريقها إحنا فريقنا كله علي قلب راجل واحد وده بيوفر علينا كتير، حماس أي شخص بيخليه يسعي بشتي الطرق وفي نفس الوقت بيقرب المسافات جدًا بين الأشخاص وبناءًا عليه فريقنا كله علي نفس الأرضية سواء من روح الشغل أو العلاقة المتبادلة بين الفريق
فريق ارسم حلمك بيقسم الشغل ازاى ؟
كطبيعة أي مؤسسة; بنتقسم للجان لوجستيك، علاقات عامة، تمويل، لجنة إعلامية ومواقع تواصل إجتماعي بما فيها مصورين وغيره، المتطوعين متوزعين علي اللجان حسب خبرة كل واحد أو أكتر مجال مؤهل فيه.. لكن بسبب الحماس زي ما قولنا قبل كدا بيخلي المتطوع عايز يساهم في حاجة وأتنين وبيشتغل فيهم بنفس الكفاءة ، بغض النظر عن التنظيم الإداري فالمتطوعين بالنسبالهم إن الشغل يطلع بأفضل جودة ده بيسهل كتير علينا.
3 كلمات بتعبر عنهم ارسم حلمك ؟
إبداع بأيدي متعففة.
ازاى بتقدروا توصلوا للناس؟ ازاى بتوصلوا رسالتكم للناس ؟
مبدئيًا تميز المنتجات ده اللي بيوصل المنتجات جدًا للناس، خصوصًا إن التصميم سواء ألوان و كلمات وخامات كلها مستوحاة من البيئة المصرية اللي حولينا وده في حد ذاته تميز لينا، استخدام قش الأرز في الغلاف ده بيضيف تميز لمنتجاتنا اللي بننفرد بيه في السوق كله، العملاء لما بيعرفوا أنه المنتجات صُنعت بأيدي اسر متعففة بينبهروا بجودته مع عدم معرفة كبيرة من الأسر بالصناعات اللي من النوع ده ، ودي من الحاجات اللي بننفرد بيها عن غيرنا برضو، وبفضل الله الأسباب دي كانت مؤشر قوي جدًا لدخولنا سوق المنافسة بمنتهي السهولة وأدي لتوافر منتجاتنا في أماكن عدة بمنتهي السهولة.
ارسم حلمك كيان شايف نفسه قادر يضيف ايه كمان لنقسه , يتوسع ازاى , يساعد اكتر ازاى ؟
هدفنا الأول والأساسي كمشروع هو مساعدة الأسر المتعففة من خلال نوع جديد من الصناعات وفي الوقت نفسه عايزين ندخل نوع جديد من المنتجات اللي بيتعمل بأيدي متعففة للسوق مش بس عشان نساعد أسر تعتمد علي نفسها بس عشان نشجع الشباب علي الإقبال علي مساعدة المحتاج، لسه قادرين نضيف أكتر بإنضمام أسر أكبر .. في إعتقادنا أنه كمان كام سنة مش هنكون ورش عمل متفرقة هيكون لينا مصنع فيه مئات الأسر اللي شغالة علي المنتجات ومنتجاتنا مش هتكون عبارة عن بلوك نوت وشنط بس، وهدفنا الأكبر وصول المنتجات الأسر لمكتبات خارج مصر وده اللي شغالين عليه حاليًا إن شاء الله.
اترك تعليقاً
يجب أنت تكون مسجل الدخول لتضيف تعليقاً.