Safe كيان عمرى ما كنت سمعت عنه الا من كام شهر و انبهرت كأم ان اصلا موجود الكيان ده فى مجتمعنا ، مين هما saFE ، هما مجموعة اختارت توعى الاطفال و الأباء و الأمهات و كل القائمين على التربية , بداية من المدرسين وصولا الى دادة الأولاد عن التحرش الجنسى بالأطفال، و يمكن الموضوع ناس كتير اوى بتتجنب تتكلم فيه خاصة أولياء الأمور بس أنا كأم استشعرت الحاجة الملحة جوايا ان لازم احضر ورشة العمل ده انا و ابنى و فعلا حجزت و كنت حرفياً بعّد الساعات علشان احضر الورشة ده و ابنى يفهم حدود جسمه بطريقة مختلفة و اسلوب مختلف سلس و بسيط و انا كأم اعرف اكتر عن التحرش الجنسى فى الاطفال و ازاى ممكن اتجنبه ، ايه علامته و ايه اللى المفروض يتعمل .
بدأت المحاضرة اللى قائم عليها فريق عمل safe ، و بدأت المُحاضرة سارة عزيز – مؤسسة كيان safe – فى شرح ايه هو التحرش الجنسى ، نسبته فى مجتمعنا ، و ازاى اصبح ظاهرة منتشرة بشكل يخوّف مش بس من الكبار لكن كمان تحرش الاطفال بالأطفال . الصور اللى نزلتها safe للمحاضرة ده ، كل صورى فيها تنم عن الصدمة و القلق و كأن باب علم يخوّف اتفتحلى فجأة وقفت عاجزة عن النطق بسهولة ، كل ده و أولادنا فين ؟ أولادنا بره بيلعبوا و يتنططوا و يغنوا ، كل حاجة عملوها مع الاولاد ليها علاقة مباشرة بطريقة توعيتهم عن أجسامهم و حدودها ، الظريف ان القائمين على ورشة عمل الأطفال فاهمين شغلهم كويس جداً و ده حسيته لما ابنى بدأ يدندن “أنا غالى ” فى البيت ، عرفت ان اليوم جاب مغزاه و ان ابنى وصلتوا المعلومة بطريقة مبسطة و هنا جيه دورى انا ، وقت انى افهمه و أأكد لأبنى انه هو فعلا غالى.
Safe كمان بتقدم للأولاد قصة جميلة اسمها انا غالى و ده الهدف منها ان الطفل ما ينساش اللى عرفه فى ورشة العمل المبسطة ليهم ، القصة جميلة و مكتوبة باللغة العامية مع صور تجنن و تشد الاطفال بمحتواها بسيط جداً .
التحرش الجنسى بمفهومه الكبير قتل بحثا لكن على أرض الواقع مفيش انجازات ملموسة و يمكن ده دورنا دلوقتى نوعى اولادنا و نعلمهم ازاى يحافظوا على نفسهم, ميخفوش و يصرخوا بأعلى صوت وقت الخطر , محتاجين احنا كمجتمع اننا نقهم التحرش و نتصدى له علشان المتحرش لو حس ان محدش خايف منه بسبب بعبع الفضيحة اللى بيتلعب علي موضوع التحرش ده , هيخاف و يفكر مليون مرة قبل ما يقرب لطفل و انسان عاقل بالغ , التحرش اقرب مما يكون لينا بجد اقرب ما يكون , و كلامى مش علشان نخاف بس علشان نبدأ نكون ايجابين.
أنا بعتبر ورشة عمل safe من اجمل الورش اللى حضرتها فى حياتى ، علشان هى بتمس واقع مخيف كلنا عايشين فيه كأباء و أمهات ، و علشان اسوأ كابوس ممكن نتخيله هو ان حد يأذى ولادنا او حتى يفكر يأذى ولادنا و علشان كده بنحاول نسلح ولادنا بكل المعلومات الممكنة اللى بس تِهدى نار قلبنا شوية و نحاول مكون مطمنين ,
حماستى فى انى نفسى الناس كلها تحضر محاضرات safe هو اللى خلانى قررت اكتب عنهم علشان عزيزتى القارئة و عزيزى القارئ لو مسمعتش عنهم فأنت خلاص عرفتهم و ناقص بس تتحرك و تِحضر ليهم او دور حواليك يمكن فى غيرهم بيقدم نفس ورش العمل ، المهم احضر 🙂
ربنا يحفظ اولادنا جميعاً من كل شر ..
فتكوا بعافية ..
ده اللينك لصفحة safe على الفيس بوك .
https://www.facebook.com/Safekidseg
يمني جاد
photo credit: Bigstock
اترك تعليقاً
يجب أنت تكون مسجل الدخول لتضيف تعليقاً.