كتبت صفاء بسيوني:
أي قرار في الدنيا مش ممكن يكون صحيح لو تم اتخاذه في وقت غضب وانفعال أو أي ظروف غير طبيعية بتمر بيها الزوجة، عشان كده لازم ولابد تتأكدي إنك في حالة تسمحلك باتخاذ قرار مصيري زي ده لأن أول شخص هيكون متضرر لو كان قرارك متسرع هو انتي.. انتي اللي هتندمي لو اكتشفتي تهورك بعد فوات الأوان، لذلك تأكدي انك عملتي كل ما في وسعك لإنقاذ بيتك ،تأكدي انك ماقصّرتيش في حق زوجك لآخر لحظة، تأكدي انك مش هترجعي تبصّي وراكي تاني وعندك يقين تام إنك ماشية في الإتجاه الصح.
خطوتك الأولى : التوقيت…
على ذكر التأنّي .. اعرفي انك لازم تختاري الوقت الأنسب ليكي واللي انتي فعلا مستعدة فيه لخطوة زي دي..
حضرتك يافندم داخلة على أصعب مرحلة ممكن أي سيدة تمر بيها في حياتها وده محتاج إستعداد وتأهّب نفسي ومادّي من حديد..
ولو انتي مش مستعدة للمواجهة هتحصلك إنتكاسة في حياتك أبسط توابعها هي الاستسلام والندم على قرار انتي عارفة ومتاكدة إنه صح .. لكن مشكلتك كلها بتنحصر في التوقيت.. وعليه، على سبيل المثال وليس الحصر..
لو انتي سايبة شغلك لأي سبب إرجعيله فورا ولو مش بتشتغلي أساسا ابدأي دوّري على شغل .. لو ظروفك ماتسمحش بالإلتزام بمواعيد شغل يومية لازم تعرفي إنه في فرص شغل بتتوفر من البيت وبتحتاج منك ساعات عمل قليلة ( ابحثي وهتوصلي لنتيجة بإذن الله)…
أما لو كل ده مش مناسب فهنا هقولك فكّري في مشروع صغير في حدود إمكانياتك وابداي إسعي فيه ( على فكرة في مشاريع بتبدأ بأرقام لا تذكر زي الكروشيه وبعض الأعمال اليدوية لأنها مش بتحتاج خامات غالية ولا مكان ولا ماكينات)…
وانا هنا ضربت مثال بالشغل وانا عارفة إنه في ستات ميسّرة الحال وممكن مايكونش الشغل ضرورة لها في المرحلة دي لكن الهدف هو إنك تكوني مستقلة ماديا ومعنويا كمان وعندك كيان مشغولة بيه عن كل مراحل الحزن والإكتئاب اللي أكيد هتمرّي بيها، انتي بتمهدّي لنفسك الطريق لكونك معتمدة على نفسك وواقفة على رجلك مش محتاجة لحد يسندك.
خطوتك التانية : أطلبي المساعدة من أهل الثقة وماتتردديش…
لجوئك لشخص متخصص او أستشاري في الإطار ده هيفرق كتير وتقدري تتاكدي من ده بالبحث والقراءة في تجارب سيدات مشابهة لتجربتك وده مهم بصفة عامة للتعلّم من أخطاء الغير دون الوقوع فيها ..
دور الإستشاري هو مساعدتك على تخطي المرحلة دي بسلبياتها و دعمك في لمس الإيجابيات في طلاقك لأنها في الحقيقة بتكون ولادة حياة جديدة من حياتك القديمة اللي هتعيدي هيكلتها حسب رغبتك و إنتي بس اللي بتقرري معايرها.
خطوتك الثالثة : مرتبطة بالخطوة الثانية وهنتكلم فيها عن نفس مبدأ طلب المساعدة …
لكن من صديقاتك محل الثقة .. صديقاتك الايجابيات القريبات من قلبك واللي هيفهموكي ويستوعبوكي ومايكونوش عبء عليكي بنصايحهم وكلامهم الكثير وأفعالهم القليلة..
ابحثي في قائمة صديقاتك عمن تشبهك واللي هتقدر تملأ حيّز كبير من الفراغ العاطفي اللي أكيد هتشعري بيه في المرحلة الحالية.. ومش هاوصّيكي .. إبتعدي كل البعد عن الشخصيات السلبية في المجمل .. وخاصة السيدات على شاكلة ( غيّري من نفسك عشان تملي عين جوزك وتكسبيه، الست الشاطرة هي اللي تعرف تحافظ على بيتها ، مين هيرضى بيكي وانتي مطلّقة؟؟؟) وافتكري ان مافيش حد عاش حياتك ولايقدر يقررلك مستقبلك .. انتي وبس الأدرى بحالك وظروفك.
خطوتك الرابعة : اقرأي وتثقفي …
هتكتشفي بنفسك إن الحياة أكبر من إنها تتلخص في الزواج، ان سيدات كتير فشلوا في كونهم زوجات لكن نجحوا في جوانب تانية من حياتهم واكتفوا بده ومابصّوش وراهم تاني.. بل شعروا بالندم على اللي فات من عمرهم في التردد مابين الطلاق والاستمرار في حياتهم الزوجية الفاشلة واللي بدوره كانله تأثير سلبي عليهم وعلى أسرتهم.
خطوتك الخامسة : مارسي رياضة بتحبيها..
انا هنا مش هاشرح أهمية الرياضة لأننا كلنا عارفين تأثيرها الإيجابي على الصحة الجسدية والنفسية لكن هافكرك ان الرياضة مش بس كرة قدم وسلة و يد .. الخ
الرياضة ممكن تبقى ركوب العجل او جري أو ايروبكس و أي اختيارات كتير حلوة وسهلة وممكن تمارسيها بشكل فردي أو في البيت.
خطوتك السادسة : إحضري ندوات ..حفلات .. مسابقات ..
إبعدي عن جو البؤس والحزن واللهفة إياها…
إفتكري انتي موهوبة في ايه وحاولي تنمّي موهبتك وتاخدي كورسات لو تقدري وده طبيعي هيساعدك تبدأي مشروعك الصغير اللي كنتي دايما بتأجليه..
ملحوظة صغيرة : خطواتك الخامسة والسادسة (عن تجربة) هيفتحولك الباب لتوسيع دائرة معارفك بأشخاص إيجابيين هيضيفوا جدا لحياتك وهتعرفي معاهم تخوضي تجارب مفيدة وجديدة هتكتشفي فيها نفسك من جديد وهتغيري نظرتك السطحية عن الحياة.
خطوتك السابعة : اكتبي خواطر .. عبري عن مشاعرك المكبوتة …
النقطة دي مهمة جدا من أكتر من جانب .. يعني مثلا هتساعدك على الإحتفاظ بأسرارك لنفسك وبالتالي مش هتقعي في فخ الفضفضة مع ناس ممكن تكتشفي بعد كده إنهم مش محل ثقة وكان كل همّهم يرضوا فضولهم بالإطّلاع على حياتك الشخصية مش أكتر…
الخواطر هتساعدك انك تتكلمي مع نفسك وتتخلّي عن تبريرك لكل اللي حواليكي .. انتي ليه اتطلقتي؟؟؟ ومحاولة اقناعهم إنك مش مسئولة لوحدك عن الوصول للنتيجة دي.. الخ
خطوتك الثامنة والأخيرة :خدي وقتك …
إفتكري انك محتاجة فترة لا بأس بها عشان تتخطي التجربة السابقة .. محتاجة تراجعي أولوياتك وتستغلي الفرصة عشان تتعرفي على نفسك أكتر وممكن جدا تكتشفي انك حبّيتي استقلاليتك ومابقاش عندك استعداد تخاطري بيها وممكن كمان تكتشفي ان احتياجاتك اللي كنتي بتدوّري عليها في شريك حياتك اتغيرت.. هتكتشفي انك انتي شخصيا اتغيرتي…
والاكتشاف ده مش هيحصل غير لو عرفتي انك لازم تاخدي وقتك قبل الدخول في اي تجربة جديدة، محتاجة تراجعي أخطائك وتتعلّمي منها عشان ماتقعيش فيها مرة تانية ومنها لفشل جديد.. اخرجي برة الدايرة وارسمي طريق جديد واكتشفي أخطائك والمسيها لأن ده السبيل الوحيد اللي هيساعدك لتجنبها.
إنتي دلوقتي وصلتي …
كوني قدوة لسيدات ماعندهمش شجاعتك.. إثبتيلهم إن الطلاق عمره ماكان نهاية الحياة
مواضيع أخري اخترناها لك:
