طبعًا يا جماعة محدش يقدر ينكر في الوقت الحالي إننا بنعيش حالة من الأمن والأمان والاستقرار، وعشان كده تمكَّنت أجهزة الحرامية من سرقه كابل التليفون الخاص بمنطقتنا مرتين! كنت حاسة وأنا من غير إنترنت إني عايشة في النجع! كانت أيام جميلة الله لا يعيدها.

ندخل في الموضوع إللي بقاله فترة بيلح عليّا أكتبه، بسبب إني في فترة قصيرة اتعرضت ليه كتير مما جعلني أفتح صندوق ذكرياتي الجميل لأجد فيه الآتي:

_بقيتي في سنة كام يا حبيبتي؟
_الإعدادية يا طنط.
_الله يكون في عونك, شدي حيلك عشان دي شهادة.. هي صعبة وتقيلة بس كله بيعدي يا كتكوتة.

**

_داخلة سنة كام يا مونمون؟
_كبرت دلوقتي يا طنط وداخلة تانية ثانوي
_ما شاء الله.. علمي ولّا أدبي؟
_أدبي إن شاء الله.
_مممممممممم.. ليه كده؟ ده الحفظ فيه كتير أوي، واتفرجي في الشارع كده هتلاقي بتوع تجارة وآداب وحقوق بيشتغلوا جرسونات وسرّيحة، وحتى بتوع سياسة واقتصاد تلاقيهم حسابات في محلات عصير القصب.
_خلاص يا طنط، أدخل علمي.
_بصي يا حبيبتي، علمي رياضة لو مادخلتيش منه هندسة تبقي ضيعتي وقتك ومجهودك وفلوس أهلك، وعايزة أقولك إن التنسيق في البلد دي زفت. أما علمي علوم فـيا طب يا صيدلة، وإنتي طبعًا عارفة في مصر ماتخديش نصيحة من دكتورة أبدًا.. ماتتعبيش نفسك يا بنتي، البنت مسيرها لبيتها وجوزها.

**

_جيبتي كام يا حبيبتي في الثانوية العامة؟
_98%.
_ما شاء الله.. خدي بالك هاتخدي عين تجيبك الأرض.
_طيب جبت 65%.
_ليه يا بنتي كده؟! هو أهلك قصَّروا معاكي في حاجة؟

**

_كتكوتتنا الحلوة قربت تخلص الجامعة.. مفيش عريس كده ولّا كده؟
_لأ لسه يا طنط.
_معلش يا حبيبتي، حال البنات كلها كده.

**

_جالي عريس يا طنط.
_وبيشتغل إيه يا حبيبتي؟
_ظابط.
_ربنا يكفيكي شرُّه.. دول صعبين أوي، وماتخديش منهم لا حق ولا باطل!
_مهندس.
_دول دلوقتي يا مش لاقيين شغل، يا بيقبضوا ملاليم، يا متغرَّبين.
_عربجي.
_لا حول الله! بنت الحسب والنسب يجيلها كده! يلّا.. أهو أحسن ما تعنِّسي.

**

_الفرح إن شاء الله كمان شهر يا طنط.
_مستعجلة على إيه يا بنتي، ما كنتي ف بيت أهلك مرتاحة! بكره تقولي ولا يوم من أيام ماما وبابا.. ده إنتي بكره مش هتفوقي من الكنس، والمسح، والطبيخ، والعيال.. دي سوكة بنتي كبرت بعد الجواز ييجي 30 سنة!

**

_طنط، أنا حامل.
_يا حبيبتي، مش محتاجة تقولي لإنه باين على خلقتك.. اتبهدلتي خالص أهو.. ربنا يقومك بالسلامة. إلحقي نامي عشان بعد كده عايزة أقولك مش هتلحقي تشربي بق ماية مش تنامي! ربنا يقومك بالسلامة.. دي سوكة هتتجنن من قلّة النوم.

**

_ورّيني حبيب قلب تيتا.. إيه الوحاشة دي.. شكله هيجننك.

_البيبي بدأ يزحف.
_اتفرجي بقى ع الكريستالات إللي هتتكسر ومش هتبقي عارفة تلِمّي إيه ولّا إيه.

_البيبي بقى بيمشي.
_ربنا يقدرك.. هتلاقيه بيجري منك شوية، ويتوه شوية، وتشدّي في شعرك شوية.

_البيبي دخل المدرسة.
_يااااااااااه! ربنا معاكي.. مذاكرة، وسهر، وقرف.

_ابني اتخرج.
_ألف مبروك.. ربنا يعينكوا على ما تلاقوا ليه شغل ولّا عروسة.. دي الحياة غالية نار.

_ابني هيتجوز.
_وليه بدري كده؟ ما كنتي سبتيه في حضنك شوية! على إيه تجيبي واحدة تاخده منك بدري كده وتطلع عينه؟

_هابقى جدة.
_بكره مراة ابنك تسيبلك الواد، وتقولك مشغولة يا طنط، واشربي بقى.
الناس دي غالبًا هتكون قابلتها في حياتك أو حياة الآخرين.. بلاش تكون منهم لإن النبي (صلّى الله عليه وسلم) يقول: “إن العبد ليتكلم بالكلمة من رضوان الله لا يلقي لها بالًا يرفعه الله بها درجات، وإن العبد ليتكلم بالكلمة من سخط الله لا يلقي لها بالًا يهوي بها في جهنم”.. صدق رسول الله (صلّى الله عليه وسلم).
خد بالك.. ممكن مثلًا تشجع واحد على المذاكرة فيبقى ناجح فتاخد ثوابه، وممكن العكس وتاخد سيئات لإنك أحبطته وحسسته إن مفيش فايدة!

 

ايمان عبد النبي

 

photo credit: Bigstock