انهاردة 8 مارس، اليوم العالمي للمرأة، وعشان بكرة هتسمعي عن ستات كتير عملوا حاجات عظيمة جداً تستاهل انهم يدخلوا التاريخ عشانها، أنا جاية النهاردة اقولك انك لازم تحضري نفسك انتي كمان للاحتفال، عشان انتي واحدة منهم.

مش لازم تكوني ماري كوري علشان تحسي انك عظيمة، إنتي أعظم واحدة في حياتك.

مش مصدقاني؟؟

طب ركزي كدة في صوابعك اللي مليانة جروح من سكاكين المطبخ، فكري كام مرة طبختي أكل حلو أهل بيتك استمتعوا بيه ومحدش عرف انك وقفتي كتير قدام حنفية المطبخ حاطة صوابعك تحتها علشان الدم يقف، كام مرة نزلتي السوق وشلتي شنط تقيلة وطلعتي السلم نفسك مقطوع من التعب، فكري كام مرة سهرتي تفكري في مصروف البيت وازاي هتدبري الشهر بالمبلغ اللي فاضل معاكي.

طب ركزي في كل مرة إينك أو بنتك مكانوش فاهمين حاجة وانتي قعدتي تدوري وراها عالنت لحد ما عرفتي الإجابة ونورتيلهم عقلهم، كام مرة وقفتي قدام حاجة نفسك تشتريها ومحصلش علشان ولادك محتاجين شوية رفاهيات أو خروجة حلوة أو لبس جديد، كام مرة كنتي ميتة من التعب بس صحيتي الصبح فطرتي الولاد ولبستيهم ونزلتيهم المدرسة.

طيب فاكرة لما كان عندك مشاكل كتير بس روحتي شغلك وخلصتي كل اللي عليكي من غير ماحد يحس بماتش الكورة اللي شغال جوة دماغك؟؟

فاكرة لما كانت صاحبتك محتاجاكي وانتي نزلتي علشان تكوني جمبها برغم ان كان وراكي ألف حاجة تانية لازم تتعمل وجيتي على نفسك علشان متكونش لوحدها؟؟

عارفة انتي قد إيه عظيمة في كل مرة حاربتي في المواصلات وفي الشوارع وسبتي السرير ونزلتي علشان مينفعش تغيبي من الشغل حتى وانتي تعبانة؟؟

سواء كانت إيديكي فيها جروح من السكاكين علشان انتي ربة بيت، أو صوابعك فيها حبر أزرق علشان انتي امرأة عاملة، سواء كنتي بتحاربي في الشوارع أو بتحاربي مع الغبار اللي تحت الكراسي، سواء كان مديرك شخص مبيقدرش مجهودك أو غسالتك مش بتنضف الغسيل كويس، سواء كنتي عارفة أو مش عارفة انك شايلة العالم على كتافك، بكرة لازم يفكرك بكل دة.

اليوم العالمي للمرأة مش مناسبة بنحتفل بيها، مش بنجيب فيها دباديب ولا حد هيقوك كل سنة وانتي طيبة، يمكن يكون مناسبة هتخليكي تحزني ان صورتك مش موجودة في الجرايد ولا على المواقع الإخبارية المهمة، ودة سبب كتابة المقال.

أنا عايزة اقولك انك مهمة، وانك مؤثرة، وان من غيرك الحياة مالهاش طعم، طب قوليلي كدة من غير حلاوة الستات الدنيا كان هيبقالها طعم ازاي، إزاي كان ممكن كل الجمال يبقى موجود حوالينا، مين كان هيهتم انه يخلي الحياة أحلى.

مين غير الستات يقدر يفرق بين التركواز والأزرق؟؟ ومين كان هيشتغل كروشيه الراديو مع كوباية الشاي وهو بيفكر يجيب هدايا للغاليين؟؟ طب مين كان هيحكي الحواديت للعيال الصغيرين ويخلي عقلهم يفتح ويستنوا يكبروا وميخافوش من الدنيا؟؟

من غيرك – صدقيني – الدنيا كانت هتبقى مملة أوي.

بكرة يوم المرأة العالمي، ولازم تحسي في اليوم دة إن اللي انتي بتضيفيه في الحياة حاجات مستاهلة التعب، إبتدي بكرة في التفكير في أهمية كل خطوة من خطوات يومك، إبتدي في التفكير ان عجلة الحياة بتدور لما انتي بتفتحي عنيكي، مجهودك دة مش أي حد هيعرف يعمله، ووجودك فارق في حياة الكون.

شوفي قيمتك وقدري نفسك عشان اللي حواليكي يشوفوها، متستنيش التقدير من برة، لإن اللي مبيحسش بقيمة نفسه محدش بيحس بقيمته.

بكرة الصبح لما تصحي، بصي في المراية وصبحي عالست المعجزة اللي هتبصلك من الناحية التانية، وقوليلها انك فخورة بيها وانك مقدرة كل اللي هي بتعمله، دلعيها وفهميها انها مهمة وانها خارقة، حسسيها ان وجودها في الحياة هو اللي مخلي لحياة اللي حواليها طعم.

لو عندك بنت، قوليلها ان يوم المرأة العالمي دة يوم مهم، وانها مش لازم تكون مخترعة ولا مشهورة علشان تستحق الاحتفال باليوم دة، إزرعي فيها أهمية وجودها في حد ذاته، متخليش حد يقنعها انها عايشة من غير قيمة، وفهميها ان مهما كان مكانها في الحياة، فهي مسمار مهم جداً، من غيره الحياة عمرها ما هتكون ماشية صح.

متخليش حد يقنعك انك عشان ربة بيت أو موظفة في شركة أو يومك مفيهوش إثارة بالمعنى المتعارف عليه فانتي متستحقيش الاحتفال، الإثارة ممكن تكون مستخبية في حاجات كتير في يومك، في أكله يطلع طعمها حلو أوي، في كتاب تقريه وتعلق في مخك جملة منه تخليكي تغيري تفصيلة صغيرة في حياتك، في حاجة تعمليها في شغلك محدش كان عارف يعملها وانتي تخلصيها ببساطة، في إنجاز إبنك أو بنتك تعمله علشان انتي ربيتيهم صح، في زوج عايز يرجع البيت بسرعة عشان تعبان وبيرتاح في البيت اللي انتي شايلة مسئوليته.

اليوم يومك، إنتي الست اللي اللي قادرة تكون موجودة بقوة كل يوم، ومؤثرة في كل لحظة، تستاهلي الدنيا كلها تنحني لك احترام، وتقولك كل سنة وانتي طيبة.

 

إنجي إبراهيم

 

 

photo credit: openclipart