فيه كلام منتشر أوي اليومين دول.. من نوعية
“أنا مش محتاجة لحد”..
“عايزة أعيش لوحدي”..
“محدش يستاهل”..

وكلام كتير من نفس النوعية…

وده كلام عكس الواقع وعكس ما خلق الله

ربنا خلق الناس بعضهم لبعض أصحاب وأهل وعون.. وبعضهم لبعض فتنة وإبتلاء..

كلنا محتاجين لبعض.. بس هي القضية “محتاج لمين، وإزاي؟!، ولأنهي درجة؟!”

يعني أنت محتاج لأهلك.. سندك وعونك وحضن تطمن له..
محتاج لأصحابك.. عشان تغير جو.. تفضفض.. تشارك افكارك مع حد قريب من فكرك وسنك..
محتاج لناس تعلمك وتنفعك في حياتك.. عشان تكمل مشوارك
محتاج حتى لغفير العمارة عشان يحرص لك بيتك
محتاج للناس اللي انت متفوق عليهم مادياً او اجتماعياً أو فكرياً.. عشان تتصدق لهم بما لديك

يعني كلنا محتاجين بعض. بس مينفعش يبقى احتياجنا معتمد “بشكل كلي” على فئة واحدة من اللي فوق..

دي إسمها علاقات إجتماعية “سوية” كل إنسان سوي بيحتاج ليها.. ولو مش موجودة في حياته
هتخليه “مش سوي” في الحتة دي

مش معنى كده ان كل الأهل والأصحاب وغيره.. زي الفل
عشان كده قولت ان فيه منهم سند، وفيهم منهم إبتلاء..

ربنا بعلمه بيقدر لك احتياجك، اذا كنت محتاج سند في فترة في حياتك.. هـ يمدك بيه..
وإذا كنت محتاج اختبار ما.. هـ يختبرك وهو يعلم أنك تقدر تستحمله
<<لَا يُكَلِّفُ اللَّهُ نَفْسًا إِلَّا وُسْعَهَا لَهَا>>

فـ مش مع أول إختبار ليكـ.. تقول “خلاص أنا مش عايز حد”.. وتعمم الحالة الصعبة اللي مريت بيها على كل الناس اللي حواليكـ..

ومينفعش دايما حبايبك يكونوا حاسيين “انهم ميفرقوش حاجة في حياتك”..

بالعكس.. طمنهم زي ما انت تحب اللي بيحبك انه يطمنك..
وحسسهم بقيمتهم لان ده بيخليهم في حالة أحسن وبيكونوا مقبلين على الدنيا بكل صعابها بشكل أحسن لمجرد أنهم حسوا انهم مهمين في حياة حد تاني..

حب الناس واحتاج ليهم.. بس على قدرهم البشري
دون تعلق او زيادة تمسك.. او حب تملك

حب واحتياج بشكل معتدل.. بشكل طبيعي.. بشكل آدمي

وخلي الحب والإحتياج المطلق.. والتعلق الآبدي.. لله عز وجل فقط
هو اللي يستحق المكانة العالية دي..

وما دون ذلك..خليه لـ الناس حبايبك.. بـ إعتدال

ربنا يؤنس قلوبكم بـ ناس نقية تقدركم.. وتحافظ عليكم.. وتكرمكم..
وتعطي كل منكم حقه واحتياجه الصحيح

هبة سمير

 

مواضيع أخري اخترناها لك:

علي الحلوة و المرة

5 أشياء تعلمتها من القلق

مرة فيهم هتنور

قصة الصياد