أُمّهات وآباء كتير عندهم مشكلة في إزّاي يتعاملوا مع إخفاقات الحياة عند ولادهم؟ فتبدأ الأُمّ أو الأب يطحنوا نفسهم عشان يجنّبوا الأولاد إحساس الفشل، أو الزهق، أو أي شعور سلبي آخر. لازم نفهم إن زي ما هو مهم إننا نُشْعِر أولادنا بالحب والاهتمام، وبأهميّتهم، ونحَسِّسهم بإن ليهُم قيمة في المجتمع.. زى ما هو مهم جدًّا إننا نفهم إن مش دورنا إننا نسلّيهم، أو نحميهم، وننقذهم من سلبيّات الحياة.
هل دورنا إننا نحمي ولادنا من المللّ؟ وقت الفراغ هو بداية محاولة البحث عن الذات وعن اهتمامات الإنسان.. بنفضل نجَرَّب لغاية ما نكتشف فكرة أو طريقة ممتعة لقضاء الوقت.. وبسرعة تدخل الأُمّ لملء الفراغ لدى ابنها! سيشعره دائمًا بالاحتياج لعامل خارجي يسلّيه وينقذه.. المشكلة في تأنيب الضمير إن الأُمّ أو الأب بيحِسّوا إنهم مش عاملين دورهم صح، فعشان تخلصي من الفكرة دي افهمي إن ما دام إنتي بتقعُدي وقت خاص مُحَدَّد مع ابنك.. فما بعد هذا هو وقت لعب مفتوح له ليجد ما يلفت انتباهه. دورك فقط هو جعله يدرك ما هي المجالات المختلفة الموجودة حوله؟ فتفتحي مداركه، ممكن يقضّي وقته إزّاي؟ وبس. في السِن الأصغر احتمال تحتاجي إنك تقعُدي معاه مَرّة واحدة، عشان تعلّميه إزّاي يلعب في المحور ده؟ وبعدين خلاص، سيبيه يبدع، ويبقى دورِك التشجيع.
من ناحية تانية.. فيه عائِلات بتواجه سلبيّات مثل طلاق الأب والأُمّ.. انفصال.. خناق.. مرض.. موت. بلاش تبقي دايمًا بتلعبي دور المُنْقِذة مع ابنك، وتحميه بكل الطرق من مواجهة السلبيّات. دورِك هو تَفَهُّم مشاعره، ومساندته للمرور من الموقف ليس أكثر. ممكن تحتاجي تشرحي له الابتلاء بصورة مُبَسَّطة وبس، لكن ماتقتليش نفسك في محاولة لِعْب دورِك ودور مفقود بسبب الابتلاء. لازم تفهمي إن الأطفال بتتربّى بالإيجابيّات والسلبيّات . الإيجابيّات بتعَزِّز ثقته في نفسه، وتشعره بالأمان، والسلبيّات بتعَزِّز قدرته على المرونة، وتقَبُّل الابتلاء، وحل المشاكل، وتَعَلُّم الصبر والرضا. فلو إنتي عملتي المستحيل عشان تحميه من الحُزن ومشاعر الفقد، يبقى إنتي بتربّي شخصيّة لن تتحمَّل الحياة، وحتبقى شخصيّة تعبانة، ومُتْعِبة للّي حواليها.
ماتبقيش دايمًا عائِق في طريق تعزيز مهارات أولادِك. وسَّعي مداركِك، وخُدي نَفَس عميييييق في رحلة الأمومة، وخَلّي عندك يقين إن كل حاجة ربّنا خلقها بقَدَر، وإن دورنا هو تقَبُّل القَدَر خيرُه وشّرُّه، وتعويد أولادنا إن الحياة مش مثاليّة.. فلازم نقوّي عضلاتنا، عشان نعرف نعيشها صح.
ريهام حلمي
مدربة و كاتبة متخصصة في فن ادارة العلاقات الزوجية, و الأسرية و التعامل مع المشاعر السلبية.
مواضيع مميزة
