.
كتير من الناس بتتابع مسلسلات في رمضان، فية الي بتتابع كل المسلسلات و فية الي بتتابع واحد او اتنين و بعض الستات مش بتشوف أي مسلسلات في رمضان و بترجع بعد رمضان تشوف الإعادة. طبعا احنا كأمهات بنتفرج و طبيعي أن أولادنا حولينا… هنسبهم فين؟ صحيح الواحد بيحاول ميخليهومش يتفرجوا علي حاجة مش مناسبة بس ده للأسف صعب في رمضان لأن لو نجحنا نعمل كدة في بيتنا ممكن نبقي معزومين علي الفطار و العائلة تفتح المسلسل فالأطفال بيتفرجوا هما كمان.
و في الحقيقة مش الأطفال بس الي أصبح لازم يكون عليهم رقابة بل و المراهقين كمان مهم جداً نعرف هما بيتفرجوا علي ايه؟ لأن جزء كبير جدا من الي بيتابعوه بيأثر علي شخصيتهم و هي لسة بتتكون.
أنا في الحقيقة احترت في موضوع التحكم في الحاجات الي بيتفرج عليها الأطفال أو المراهقين و ده لأني أنا و أنا ست كبيرة وقعت في حاجة غريبة! كنت بتابع مسلسل سجن النسا و حبيت المسلسل جداً. كنت شايفه أنه كمسلسل بيقدم قصة حلوة ، أداء هايل من كل الممثلين و أخراج ممتاز. بعد كام حلقة حبيت قوي شخصية الست عزيزة تاجرة المخدرات الجدعة الي بتساعد الفقراء و اتعاطفت جداً مع زينات بنت الليل و مع دلال و غالية و شوفت أنهم طيبين جداً و ضحية للظروف.
لحد ما حد لفت نظري و قالي انتي متخيلة أنك متعاطفة مع مجرمين و بنات ليل و حبتيهم و شايفة أنهم ناس طيبة و مظلومين؟؟؟ … مع أن كل واحدة فيهم كانت تستاهل السجن و أكتر!!…تاجرة المخدرات الجدعة دي بتكسب من بيع سموم للناس و بسببها ناس كتير ماتوا أو اتأذوا هما و أولادهم و بيتهم اتخرب و غيره كتير!… أما بقي دلال حضرتك دي بنت طماعة و مادية باعت أهلها و خطيبها وودت نفسها في داهية عشان موبايل جديد و صحيح أنها في الأول مكنتش بتمارس الدعارة لكن كانت بتسهل لبنات خالتها و كمان بعد خروجها من السجن بدل ما تتوب بقت بتمارس الدعارة و بتدير شبكات كمان!! و غالية السجانة المظلومة دي هي اصلاً زانية!! و هي الي عملت كدة في نفسها و هي كانت عارفة كويس جداً إن صابر ده شخصية بلا أخلاق و حشاش و كل الي يهمه مصلحته و أزاي يجيب فلوس بأسرع طريقة و مع ذلك أتجوزته و أدتله كل فلوسها. و بعد ما خرجت من السجن قتلته هو و صديقته الحامل و كلنا سقفنا و قولنا أنهم يستاهلوا مع إن دي جريمة بشعة!! و زينات فهي تركت كل طرق الكسب الحلال و شافت إن ممارسة الدعارة أكرم ليها من الشغل في البيوت !
السؤال دلوقتي إذا كنا احنا كستات و أمهات قدرت الدراما التلفزيونية أنها تخلينا نتعاطف مع النماذج دي من المجرمين و نحبهم أمال الأطفال او المراهقين الي لسه شخصيتهم بتتكون ممكن يحصل أيه في تفكيرهم و طريقة حكمهم علي و تقيمهم للامور؟؟؟
الانترنت مش مخالينا نقدر تعمل الرقابة الكافية خصوصا إن الممنوع مرغوب و كل حاجة أصبحت في متناول يد الأطفال عشان كدة لازم يبقي في رقابة كافية و كمان نفهمهم كويس و بالإقناع و الحوار ايه الي يتفرجوا عليه و ايه الي ميتفرجوش عليه و نوضحلهم و نتناقش معاهم و يبقي درس مفيد لأولادنا.
ريهام شريف
بكالريوس أعلام الجامعة الامريكية
[اقرئي أيضا: ماذا يفعل التلفزيون بعقول أبنائنا]
[اقرئي أيضا:مترجم: لا يستطيع الأطفال استخدام لعبة المكعبات بسبب أدمان الآي باد!]
[اقرئي أيضا: خروج الجيل عن السيطرة!]
[اقرئي أيضا: حكاية وجوه مصرية]
[اقرئي أيضا: الملوك لا يدمنون المخدرات]
السلام عليكم
والله أنا شايفه إن معاكى حق فى كلامك, دلوقتى المؤلفين بقوا يصنعوا شخصيات بدون أخلاق وغير سويه بالمره ومطلوب مننا إن إحنا نتعاطف معها و نلتمس لها العذر, الدراما أصبحت تصور المرأه صندوق بنادورا, ورمز للخيانه والقبح, وفى نفس الوقت بيقولوا معاً ضد الإساءه للمرأه و معاً ضد التحرش, فين أخلاقنا وقيمنا والعادات العربيه الأصيله, زمان كانت المرأه والأم فى المسلسلات رمز للعفه والطهاره والإخلاص وكانت بتكون مثل أعلى , دلوقتى بيجيبوها خاينه والمفروض إننا نتعاطف معها, حاجه تقرف .
وبرده الخطر ممتد للأطفال, عنيكى لازم تكون عليهم على طول علشان متضعش الطفوله والبرأه إلى فيهم وتلقيهم كبروا بدرى, لازم تحددى ليهم قنوات للأطفال معينه بتزرع القيم والأخلاق الحميده فيهم وتنمى طفولتهم, ويارب يحمينا و يحميهم من كل شر… وشكراً.