ليه يابنتي كده هاترمي ولادك….
معلش تعالي على نفسك شوية عشان خاطرهم…..
حرام عليكي هاتيتميهم وابوهم عايش….
ياعيني ياحبايبي أمكم رمتكم……
معلش هي الابهات كده مش بتحس بولادها…..
اللي بيجرالكم ده صعب قوي ماحدش يستحمله…..
لا حول ولا قوة الا بالله قلبي معاكم…..
مافيش حد في سنك يشيل اللي انت شايلاه ولا يستحمل اللي انت مستحملاه…
خلوا بالكم من بعض مالكمش غير بعض ياولاد….
اكيد مامتكم ماكانتش بتحبكم قوي…..
اكيد باباكم كان مش مرتبط بيكم
___________________
ممكن اكتبلكم تعليقات زي دي للصبح كنت بسمعها وانا طفلة عندها 8 سنين
كل واحد يقابلني يعرف ان ماما وبابا اتطلقوا يتحفني بتعليق جديد ومبتكر من نفس التعليقات السلبية
وبعدين بكل بساطة يروح بيته ينام مرتاح وأنا أو اخواتي أو أمي أو أبويا نبات مقهورين ومتضايقين وطار النوم من عنينا
يسيب طفل حاسس بالحرمان وماكانش حاسس بيه قبل تعليقه
يسيب أم مقهورة فوق قاهرتها ان اولادها تعسا وأن هي السبب في تعاستهم
يسيب أب شايل الهم فوق راسه ان اولاده ضاعوا وبقوا مشردين
قال رسول الله صلى الله عليه وسلم “فليقل خيرا او ليصمت”
عندك كلمة تطبطبي بيها قوليها
عندك كلمة تساعدهم يكملوا وهم سعدا قوليها
عندك كلمة تحسسهم ان ده عادي وانهم بدأوا حياة جديدة ممكن تكون أسعد قوليها
غير كده ليصمت
مش معنى ان ام اتطلقت يبقى اختارت أنها تتعس اولادها اكيد عندها سببها اللي ماتعرفيهوش واللي مش لازم تعرفيه اصلا
مش معنى ان اب طلق مراته انه رامي عياله اكيد عنده سبب ماتعرفوهوش ومش لازم تعرفوه
سيبوا الناس في حالها
خلاص زواجكم سعيد قوي احمدوا ربنا على عافيته
بلاش تاذوا الناس بكلامكم
في بيوت كتير مقفولة على زوجة تعبانة وخايفة تطلق عشان كلام الناس عن تعاسة أولادها ، وأولادها تعسا بتعاستها أصلا، مع انها ممكن بطلاقها تبقى سعيدة وتسعد أولادها
وفي بيوت كتير مقفولة على اب هرب من البيت من تعاسته ومش عارف يتعامل مع أولاده نهائي عشان بس مايطلقش ويتعس أولاده وأولاده تعسا بعدم وجوده وكان ممكن الطلاق يكون سبب لأنهم يقضوا وقت سوا ويبقوا أسعد
والله هي خايفة على اولادها كلمة طبطبة تخليها تاخد بالها منهم
والله هو زعلان على اأولاده كلمة حنينة تخليه يتفتح نفسه ويفكر ازاي يعوضهم
ربنا سبحانه وتعالى نفسه بيطبطب عليهم وبيقلهم ماتخافوش .. “وَإِن يَتَفَرّقَا يُغنِي اللهُ كلاً مِن سَعَتِهِ”
فعلا عن تجربة, حالات طلاق كتير جدا الأولاد تعبوا فيه كان السبب كلام الناس لهم
لو اتنين مش متفاهمين ربنا شرعلهم الطلاق عشان يبدأوا حياة جديدة مع حد يساعدهم يكملوا في حياتهم
مش معنى أن في حالات فردية مهملة نعمم ويبقى كل اللي بيطلق وحش
مش معنى أنهم اختاروا مايكملوش سوا أن حد فيهم لازم يطلع وحش
كلامي مش عشان أشجع على الطلاق
لكن الطلاق في أوقات كتير بيكون حياة جديدة لشخص فقد الامل في الحياة
حياة جديد لأطفال مش عارفين يعيشوا مع صوت الخناقات العالي
حياة جديدة بعيدة عن الجو المشحون والخناق المستمر
حياة جديدة فيها ماما مش بتعيط وبابا مش بيزعق
الطلاق بداية بعد نهاية
ارجوكم طبطبوا او اسكتوا
سيبوا الناس في حالها
مش كل طلاق بيسيب طفل تعيس
لكن كل نظرة ياعيني عليك بتسيب طفل تعيس
كل كلمة مامتك رمتك بتسيب طفل مش عارف يتعامل مع أمه
كل كلمة باباك رماك بتسيب طفل بيكره أبوه
سيبوا الناس في حالها
وفتكم بعافية
مريم الشريف
Photo credit: Bigstock
اترك تعليقاً
يجب أنت تكون مسجل الدخول لتضيف تعليقاً.