سارة سليمان تكتب عن الثقة في النفس:
Self esteem is a judgment, Self confidence is a feeling!!
عجبني أوي في فِكْر مايكل هول إنه بيفَرَّق بين الاتنين! بيفَرَّق بين الحُكْم إللي مَبني على فِكْر في العقل إن الواحد يكون عنده “تقدير للذات” (self esteem) وبَيّن إن الواحد يكون عنده ثقة في النفس (self confidence). أعتقد إن إحنا عُمْرِنا أصلًا ما كُنّا بنفَرَّق بينهم، وغالبًا بنخْلِط دايمًا الاتنين مع بعض، وبنكتفي بالتفكير والكلام عن الثقة في النفس.
زي ما قُلْت، الثقة في النفس ده شعور: أنا واثق من نفسي, واثق إني أقدر أسوق, واثقة إني بَعرف أطبُخ. بالتالي الشعور ده بيتْبِني عليه “فعل”. إني فعلًا أستخدِم مهاراتي وأسوق، أو إني فعلًا أفَنِّن وأطبُخ لبيتي وأولادي. الفعل ده لإننا بشر عاديين، ممكن أحيانً نُصيب، وممكن نُخطئ. يعني أنا ممكن مَرّات وأنا سايقة أعَدّي السُرْعة المسموحة وآخُد مخالفة, ومَرّات ممكن أبقى عايزة أطبُخ حاجة حلوة أوي بس تتحِرِقْ مِنّي. إذا الفعل ده شئ، فأنا بحاول وبَجتهد فيه جدًّا، لكن هو دايمًا عُرْضة للنجاح أو الفشل. إحساسي إني أقدر مش معناه إني لازم أنجح, بالعكس أنا أقدر وواثق من قُدْراتي إللي بِناءًا عليها حَجَرَّب مَرّة وأفشل فأجَرَّب تاني، وهكذا.
لكن تقدير الذات أو الـ (self esteem) ده حُكْم الإنسان على نفسه. يا إمّا الإنسان يقَدَّر نفسه ويحترم ذاته يا إمّا العكس. الإنسان إللي بيحترم ذاته وبيقَدَّر ذاته ده إنسان عنده وعي وإدراك بـ “هو مين؟ وقيمتُه إيه؟”. كل إنسان ذو قيمة, مفيش إنسان مالهوش قيمة، أو مثلًا قيمة واحد أعلى من قيمة التاني. إنت إنسان فإذن إنت أعلى، وأسمى، وأرقى من إن تقديرك واحترامك لذاتك يتْهَزّ. بالتالي تقدير الذات إللي هو حاجة سامية جدًّا ورفيعة المقام جدًّا دي المفروض تكون دايمًا عالية, وفي مقام مُرْتَفِع. إوعى أبدًا تقديرك لذاتك أو احترامك لذاتك يتْهَزّ, هو ده أغلى ما يملكه الإنسان.. إنك إنسان ذو عقل، وفِكْر، وقُدْرات، ومهارات. ممكن أتصَوَّر إن واحد ثقته في نفسه تتْهَزّ, إنه يخاف من الفشل، أو يخاف من المحاولة لأي سبب كان, لكن لا يمكن أتصَوَّر أي حد تقديره أو احترامه لذاته يتْهَزّ. تخَيَّلوا المعنى ده كويّس: إن واحد يبَطَّل يحترم إنه إنسان؟! إن واحد مايفرقش معاه إنه موجود, إنه كائن! ده يعيش إزّاي؟ أتصَوَّر ساعتها إن إنسان بالفِكْر ده ممكن حتى يختار إنه يبَطَّل يعيش!!
عشان كده لمّا قرأت في الفِكْر ده -فكرة التفرقة بين تقدير الذات والثقة بالنفس- حَسّيت بالإيجابيّة.. إيه يعني إن الواحد يفشل؟ إيه يعني إني مانجَحْش من أوِّل مَرّة, عادي, حَجَرَّب تاني وتالِت، وحَكون فخورة إني بَحاول, وحَتفضل دايمًا عندي الفكرة.. إني إنسان! أنا كائن موجود، حَيّ، عايش وِسْط الناس، له قيمة وله فِكْر.. بالتالي أقدر دايمًا أجَرَّب، وأقدر دايمًا أخطئ، وده عادي ومفهوم بالنسبة لي, لإن تقديري لذاتي عُمْره ما بيتْهَزّ, وبالتالي ثقتي في نفسي حَتكون دايمًا عالية. بالفكرة دي، والحياة بالأسلوب ده هو ده إللي يصنع الإصرار والاستمرار. الحياة بالطريقة دي هي مصدر الإيجابيّة, هي مصدر النجاح. تخَيَّلوا لو رَبِّينا أولادنا على كده, إن إنت لا تُقَدَّر بثمن! إنت مُحْتَرَم ما حَييت. إغلط.. مش مهم, لمّا تغلط حَتتعَلِّم، ولمّا تجَرَّب حَتفهم. تخَيَّلوا الأولاد دول حَيتبني إيه في عقولهم؟ حَيَنْتُج عنهم إيه؟ حَيَنْتُج عنهم عَزْم, قوّة, إيجابيّة, إصرار, نجاح.. وأكتر!
فَرَّق كويّس بين إنت إيه؟ وإنت تقدر تعمل إيه؟
إنت إيه؟ إنت إنسان. إنت تقدر تعمل إيه؟ إنت تقدر تعمل حاجات كتير, منها إنك تحاول فتفشل، ومنها إنك تحاول فتنجح.. صَدَّقْني حَتِفْرِق!
فُتُّكُم بعافية..
سارة سليمان
مُدَرِّب علاقات زوجيّة مُعْتَمَد، ومُمارِس مُعْتَمَد في الـ NLP و APG
مواضيع أخري اخترناها لك:
photo credit: bigstock
اترك تعليقاً
يجب أنت تكون مسجل الدخول لتضيف تعليقاً.