الهدية عربون المحبة… وبين الزوجين بتعمل تجديد لمشاعر الحب و الدفئ بينهم…مهم قوي إنك كل فترة تجيبي لجوزك هدية بسيطة تعرفه إنك مهتمة بيه و انه علي بالك….و عشان تعملي ده بدون ما تحتاري إيه أفضل هدية للزوج فريق عمل مج لاتيه جمع لكي أفكار هدايا تتناسب مع ميزانيات مختلفة وشخصيات الرجالة المتنوعة. كمان ممكن تشتري أغلب الحاجات دي أون لاين عشان متتعبيش وعشان لو معندكيش وقت كافي أنك تنزلي وتلفي علي الهدية المناسبة لزوجك من خلال موقع سوق دوت كوم أو مواقع الانترنت الأخري المعروفة.
مبدئيا عشان تعرفي تختاري هدية لزوجك لازم تحددي شخصيته الأول عشان تقدري تختاري حاجة تتناسب مع طبيعته لأنها ساعتها هتبقي هدية فعلا عاجباه وهيستخدمها وكمان هتحسسه أنك فاهماه كويس وفهمه شخصيته…يعني لو قسمنا الشخصيات لأربع أنواع:
لو جوزك من النوع المحبوب الاجتماعي والي بيحب أصحابه قوي وبيحب الخروج كتير مثلا (الشخصية الصفراء) يبقي أفضل هدية ليه هتبقي حاجة زي:
- خروجة مفاجاءة لمكان جديد زي دريم بارك مثلا.
- تي شيرت لفريق الكورة المفضل بتاعه.
- كيس كبير جدا من مجموعة من حلوياته المفضلة.
- سلفي ستيك, عصاية السلفي الي بيتركب فيها الموبيل عشان ياخد سلفي مع أصحابه ومعاك طبعا!
- هدية من هدايا المقالب أو أقنعة الرعب الي ممكن تخضيه بيها كتجربة مبدئية!
- نظارة شمس.
- وممكن ببساطة جدا جدا تكتبي بخط جميل كدة أو تطبعيها ورقة فيها الحاجات الي عملهالك وخلاكي سعيدة بيها, ازاي بيضحك والمواقف الحلوة الي بينكوا…. معلش معلش افتكري أكيد فيه : )))))
ولو جوزك من النوع الأزرق النظامي الي بيحب النظام وبيحب الروتين جدا وتقليدي نوعا ما فممكن تجيبيله هدية زي:
- ميدالية مفاتيح لنوع عربيته لأن كل عربية خصوصا لو من الماركات الكبيرة في ليها ميداليات بتتباع مخصوص عليها العلامة بتاعة العربية.
- كافر للموبيل بتاعه.
- شاحن عربية للموبيل بتاعه.
- قلم للموبيلات التاتش, وده عوبارة عن قلم ممكن يستخدمه علي الموبيل لو موبيله من النوع التاتش.
- أي حاجة من حاجات التنظيم الي ممكن ينظم بيها حاجته زي الحاجات الي موجوده في ايكيا.
- ممكن برضو أي أدوات هو بيتسخدمها تجيبيله الأفضل منها أو الأحدث خصوصا لو بتاعته قديمة.
- شنطة ضهر أو كروس رجالي طبعا أو ممكن محفظة.
- ساعة يد.
- هتعصري علي نفسك سوق الخضار مش مشكلة دي هدية ومجاملة برضو وتكتبيله ازاي هو بيخالي حياتك أفضل وازاي حياتك هتبقي ناقصه من غيره, أيوه ناقصة… ايه؟ ناقصه نكد ناقصه خناق هتبقي ناقصة كتير ناقصه خالص : )))) (أوعي تكتبي اخر جملة دي بدل ما يقفلنا الموقع).
أما بقي يا سيتي لو جوزك الشخصية الحمرا الشخصية القوية المسيطرة سي السيد النسخة العصرية -مش عيب ميجراش حاجة- ممكن تجيبيله جاجة زي:
- مج مكتوب عليه مثلا أفضل زوج في الدنيا أو تي شيرت مكتوب عليها عبارة كدة فخيمه تحسسه أنه زوج مسيطر وأوعي وشك -معلش يا فوزية عاديها المرة دي كمان – والحاجات دي متوفرة في المولات الكبيرة في الbooths (أكشاك خشب) الي موجودة في الممرات وممكن تلاقيها في سيتي ستارز (لسكان القاهرة) وأكيد متوفرة علي الانترنت والفيس بوك.
- قلم مكتوب عليه اسمه.
- حاجة من الحاجات التكنولوجيا الحديثة يعني موبيل جديد مثلا لو ده في مقدورك أو تابلت أو ساعة.
- أي حاجة هتجيبيهاله تكون بتدل هو أد ايه زووووج فظييييييييييييييييييييييع وتحفة -أيوه أنا بتكلم عن زوجك متبصيش كدة- يعني ممكن تكتبيله برضو ازاي هو بيساعدك (يعني تخيلي يعني) أو ازاي انك محتاجاه في حياتك وانه مهم بالنسبة ليكي… اعملك ايه بقي ما انتي الي عاوزة تجيبي هدية محدش ضربك علي ايديك يعني يبقي اكتبي وانتي ساكتة : )))
أخير -أحمدك يا رب- وده أخر نوع من الأزواج لأنه تقريبا منقرض الزوج الهادي بتاع المشاعر والعاطفة والزوج دع لونه أخضر ده بقي ممكن تجيبيله:
- ورد … يا سيدي!
- تخرجي معاه خروجه عاطفية (بلاش العيال معاك يا فوزية).
- روب للبيت.
- مخدة علي شكل قلب يحطها في عربيته.
- ميدالية مفاتيح تعبر عن حبك ليه….ايه؟ مدام متجوزاه يبقي بتحبيه : )))
- ممكن تكتبيه برضو جواب حب يعبر عن اد ايه هو انسان حنين وطيب معاك…
بس المهم وانتي بتشتري الحاجات انك تحتفظي بالايصال الرجالة صاعبين الحقيقة وممكن متعجبهوش الهدية أو يحب يستبدلها بلون أو شكل مختلف مش عيب علي فكرة خاليكي عملية وبلاش الحساسية بتاعة ازاي يرجع هديتي وكدة هيفرح أكتر علي فكرة…. مع تمنياتنا لك بهدية سعيدة….
فريق عمل مج لاتيه
photo credit: Bigstock
المصدر: نادي الزوجات السعيدات
مواضيع أخري اخترناها لك:
6 أخطاء تدركها الزوجة بعد فوات الآوان
اترك تعليقاً
يجب أنت تكون مسجل الدخول لتضيف تعليقاً.