إيه رأيكم في الشبشب؟ حلو؟ مهم مش كده؟ مانقدرش نعيش من غيره… طب ولو كان بصباع؟ ولو لونه أزرق سماوي وفيه خطوط بيضاء متناسقة؟ جميل صح؟ بس ده مكنش رأي سارة لما اتفاجأت بالشبشب الجميل في وشها بعد ما نفذت النصايح اللولبية بتاعت المقالة اللي فاتت! هي في الحقيقة مش بس اتفاجأت…هي حست أنها انتقلت إلى رحمة الله وروحها خرجت إلى بارءها وطارت في السما الزرقا (اللي هي لون الشبشب الجميل اللي اترمى عليها في الواقع)…عموما العيب مش في النصايح طبعا…أكيد هي اللي معرفتش تطبقها…أو يمكن محمد جوزها كان قصده يلين الشبشب… ولذلك…ومن موقعي هذا…ومن باب إني بحب دايما أعمل الخير وأفيد المجتمع… قررت أنفض لسارة لأنها خايبة ومش عارفة مصلحتها…وأركز مع محمد دلوقتي وأنصحه وأقوله (ركز يا محمد معايا) .. شوف يا أستاذي الفاضل .. وقت الخناق عليك بالاتي:
1- علي صوتك عليها جداااا وبرأ بعينك وكلمها بحدة تخلي ركبها تخبط في بعضها…أنت مش أقل من Shrek ابن ام Shrek اللي كان بيرعب الناس بشخطته، أومال هي فاكرة أنها متجوزة قطة…هأووو.
2- وفي أوقات تانية البس وش اللامبالاة .. كأنك مش همك…ولا على بالك…ابتسم ابتسامة صفرا زي بتاعت حسين فهمي في فيلم خلي بالك من زوزو …ودور وشك الناحية التانية وسيبها تهري وتنكت في نفسها…ولو جلها سكتة قلبية منك ولا حاجة يبقى أكيد قضاء وقدر…وانت مؤمن وعارف ربنا ولا ايه؟
3- عايزاك تقاطعها كتير بكلام يحسسها أن رأيها غلط وأنها مش فاهمة حاجة في عيشتها وأنها مش من حقها تقول الكلام ده.
4- الستات عامة بتحب الغسيل والنضافة …فحاول دايما اما تلاقيها متضايقة تعملها غسيل مخ .. العب في أفكارها ومشاعرها .. “انتي مش المفروض أصلا تفكري كده”، “انتي مينفعش تحسي بكده من أساسه” ، “انتي ازاي أصلا تفكري بالطريقة دي”.. يعني من الآخر قرر انت هي المفروض تفكر ازاي وتحس بإيه…وهو الجواز ايه غير واحد ماسك ريموت مراته وبيقلب زي ما هو عايز…ستات غريبة والله!
5- مينفعش إطلاقا (وركز في إطلاقا دي) تقدّر رأيها في مرة ولا تقولها عندك حق…الكلمة دي لاااازم تتشطب من مخك…واللي هيساعدك في كده انك طول الوقت تنتقدها وتسفه من كلامها وتتريأ عليها…خلي بالك كويس لأن في فيروس اليومين دول منتشر بيجي للستات اسمه “الثقة بالنفس وتقدير الذات” وده خطييررررر لازم تحاربه بكل قوتك…ربنا يعافي مراتك ويديها الصحة اللي انت عايزها يا محمد يابني
6- عارف ايه اكتر حاجة ممكن تقطم بيها مراتك وهي بتتكلم وتضمن بيها انك هتعيش مرتاح من رغيها إلى الأبد؟ هقولك على وصفة سحرية… اكتب عندك: انت تسيبها تتكلم تتكلم تتكلم وبعدين فجأة في النص تقولها “طب ايه المطلوب دلوقتي؟” أو “خلاص انا فهمت انتي عايزة تقولي ايه” أو تعلق على حاجة ملهاش علاقة بكلامها كأنك فجاة افتكرتها…زي مثلا “صحيح اشترتي الحاجات اللي قلت لك عليها الصبح؟” .. أصل بص من الآخر .. الستات بيحبوا جدا يعبروا عن مشاعرهم وأفكارهم بالكلام.. واما بيلاقوا الراجل بيسمعهم بجد ومديهم فرصة يعبروا براحتهم بيتبسطوا أوي وبيحسوا بقربه وبحبه…وبيحسوا أنهم عايزين يحكوا له أكتر ويتكلموا أكتر…وانت مش فاضي يا محمد الله يكون في عونك…اتكل على الله يابني واقطمها
7- لو لا قدر الله في يوم من الأيام سمعتها واقتنعت بكلامها ووافقت على حاجة هي عيزاها…أوعى تبين انك موافق عشان مقتنع…ابسلوتلي …انت وافقت بس عشان “مش عايز مشاكل” أو “ما انا كل مرة بعملك اللي انتي عايزاه وخلاص” …يعني حسسها يا أخي انها ال Bad guy.
8- لو جربت كل الحيل اللي فاتت دي وفشلت في تربية مراتك…يبقى ما أودامكش غير حل واحد… التهديد بالطلاق 9 مرات في اليوم قبل الاكل وبعده…وإن لزم الأمر…طلقها وانا أجوزك ست ستها… انت عارفني أحب أخدم.
وبكده يا ولاد…ابقى قمت بواجبي تجاه الوطن…وساهمت في إصلاح بيت سارة ومحمد بعد ما كان اّيل للسقوط…وجيه الوقت اللي ندخل بيوت تانية بقصص تانية ونصايح جديدة…يا سياف…اللي بعده…ان ان ان ااااان.
هبه السواح
مديرة مؤسسة فاميليا للعلاقات الأسرية
مدرب معتمد من مؤسسة مارس فينوس ومؤسسة التهذيب الإيجابي بالولايات المتحدة الامريكية
photo credit: Bigstock
سكر 😀