إنت في بداية حياتك مُنْتَظِر زوجة شبيهة بأُمَّك.. بتضحّي عشانك، وسعادتها في رضاك. بتعمل 3 وجبات في اليوم، و بتطبُخ بنفسها، وبتنظَّف البيت بنفسها… إلخ.. وهي كمان مُنْتَظِرة واحد زي والدها، يعني هي في قِمّة أولويّاته.. لو عايزة حاجة يكون هو المسؤول يخاف عليها، ويتحمِّل مسؤوليّتها بصَدْر رَحِب، ويسعد بتلبية طلباتها، وينفق عليها بسخاء.
لمّا اتجوزتوا إنت لقيت واحدة مش شايفة إن حياتها ممكن تدور في فَلَك الطبيخ والتنظيف، وإن تبقى مُتْعِتها الوحيدة هي إنك تكون راضي. وهي لقيت واحد بيقول لها: “أنا عايز العربيّة النهاردة.. اتصرّفي وأنا مالي.. طلباتِك تجيبيها من مُرَتّبِك وتربية الأولاد مسؤوليّتك”!
لو عجباكوا الحياة دي إنتوا مش محتاجين نصايح ولا مساعدة.. أمّا لو مش عاجباكوا يبقى لازم تعرفوا إنتوا الاتنين إن “قبل الأخذ لازم نفكَّر في العطاء”، وإن طبيعة العلاقة بين زوجين تختلف تمامًا عن طبيعة العلاقة بين الأب والأُم والأبناء .
أدعوكم إنكم تراجعوا نفسكم، وقبل ما تفكروا عايزين إيه من بعض؟ فكَّروا هتِدّوا إيه لبعض؟ بس طبعًا لازم يكون عطاء مناسب لشخصيّة كل واحد فيكم.. وده بقى هنقول فيه كلام كتير بعدين.
الخُلاصة: مفتاح السعادة الزوجيّة إنك “تعطي”.. ومفتاح جهَنَّم الزواج مرسوم عليه شعار “الأنا”.
دُمْتُم سُعداء محبوبين
هويدا الدمرداش
‫مستشارة العلاقات الأُسريّة ومؤسِّسة علاقات البِنْج بونج

https://www.facebook.com/Mrs.Howayda

https://www.facebook.com/Parenting.with.Howayda

https://www.facebook.com/Mrs.Howayda.shabab

 

 

مواضيع أخر اخترناها لك:

حتي يحبك زوجك … ابتعدي عن هذه الصفات!

ما لا تعرفينه عن زوجك!

أنا بافكر أسيب البيت

 

الصورة: bigstock