اتخانقوا بالعقل! (1)

–          محمد.. أنا هقوم أساعد ماما في الطبيخ عشان ماتتعبش.

–          خلّيكي قاعدة معايا وهي لو تِعْيِت هتقولِّك ساعديني.

–          مش لازم أستنّاها لمّا تتعب.. مش كفاية إنها شايلة العيال عنّي طول ما أنا في الشغل.

–          يا حبيبتي هي اشتكت؟! وبعدين أنا ذنبي إيه إنك بتسيبيهُم معاها.. أنا عايزِك تقعُدي معايا.

–          ذنبك ايه؟؟ مش ولادك دول إللي بيتعبوها؟

–          ما إنتي إللي اخترتي تشتغلي وتسيبيهُم!

–          ما أنا اشتغلت عشان مُرَتَّيَك مش مكفّينا!

–          فيه واحدة تقول لجوزها كده؟!

–          أصلك بتعاملني كإني نازلة الشغل بمزاجي! ولّا كإنك حاسِس بالمشكلة!

–          …..

–          …..

–          …..

–          يعني إنتي بتعايريني يعني إن أهلك بيساعدوكي! طب خلّيكي قاعدة عندهم يا حبيبتي خلّيهم ينفعوكي!!

–          أنا كنت متأكّدة إنك بتكره أهلي! وكنت عارفة إنك هتبيعني بسرعة!

وهكذا استمرَّت الخناقة بين محمد وسارة حتى انتهت ماما من الطبيخ والغسيل، وانتهى معها- مع مرور الوقت- الحب والاحترام في حياتهم الزوجيّة.

كل المتجوّزين بيتخانقوا، لكن في كل مَرّة بعد دقائق معدودة من طَرْح المشكلة بنبدأ نتخانق على أسلوب خناقنا مع بعض.. على طريقة كلامنا.. الراجل بيشوف رد فعل مراتتُه تجاه المشكلة هو المشكلة نفسها، والست بتشوف رد فعل جوزها تجاه أحاسيسها هو المشكلة! وكل ما بنطوِّل في الجدال، المشكلة بتكبر والصُلْح بيكون أصعب!

السبب في ده إننا كراجل وست مش فاهمين بعض.. وكل واحد بأسلوبه بيساهم من غير ما يقصد في تضخيم الموضوع.. عشان كده هَدّيلكُم شويّة نصائح تطبّقوها في الجواز..

بالنسبة للزوجات وقت الخناق:

1- عايزاكي دايمًا تعلّي صوتك عليه، وتستخدمي مُصْطَلحات عاطفيّة: “إنت مش بتحب أهلي”، “إنت بتجرحني”، “إنت بِعْتني”.. سيبِك من نظريّة إن جوزِك مش هيعرف يربُط بين المشكلة وبين مشاعرك الجيّاشة دي، أو إنه هيقلب عليكي الترابيزة لإنك عَلّيتي صوتِك وده عيب! ولا يهمِّك.

2- ابدأي بقى اشتكي من حاجات كتير مَلهاش علاقة ببعضها (من وجهة نظره) في نفس الوقت.. يعني بدل ما تقولي له: “تعالى نتِّفق على يوم نخرج فيه مع بعض لوحدنا”.. الأفضل إنك تقولي له: “إنت أصلًا مابتحِبّنيش، وعلى طول سايبني وبتتفَرَّج على التليفزيون، وحتى أمّا طلبت منك جالاكسي جِبتِلي سنيكرس”.

3- دايمًا توقّعي منُّه رد فعل أنثوي: “ليه مابتحكيليش على أحاسيسك؟ ليه مش بترغي معايا كتير؟ إنت مخَبّي عنّي إيه؟”.. كإنك بتكلِّمي صاحبتِك بالظبط. إنتي عارفة طبعًا إن الراجل بيحب الرغي والحكايات عكس الست إللي بتميل أكتر للأفعال والقرارات!

4- قارنيه بأي شخص تاني حتى لو كان أبوه.. وبكده تضمني إنك حَسِّستيه إنه مالي عينِك مِيّه مِيّه!

5- اوعي تدّي له فرصة يتكلِّم.. هو هيقعد يشتكي هو كمان؟ رجالة إيه دي؟!

6- طلَّعي له دايمًا قصصه السودا إللي عملها معاكي قبل كده.. اوعي تنسيها! خلّيكي واعية كده ودايمًا خَزِّني في الأرشيف!

7- وأخيرًا وليس آخرًا.. اوعي تتصالحي غير لمّا يندم، ويعتذر، ويتغيَّر، ويجيب لك خاتم سوليتر هدية.

أمّا بالنسبة للأزواج.. فهَنْخَلّي نصايحه للمقال الجاي إن شاء الله.. وهَنْيّالك يا فاعل الخير والثواب.

 

هبه السوّاح

مديرة مؤسَّسة فاميليا للعلاقات الأُسَريّة

مُدَرِّب مُعْتَمَد من مؤسِّسة مارس فينوس ومؤسَّسة التهذيب الإيجابي بالولايات المتحدة الأمريكيّة

 

مواضيع أخري اخترناها لك:

الجزء الثاني للمقال: اتخانقوا بالعقل -2

أحكي و بلاش!

نصائح للأزواج… مقال ساخر جدا!

ما لا تعرفينه عن زوجك!

أنا و حماتي… سمن علي عسل!

 

الصورة: bigstock