ماما…يعني إيه خادمة؟

                    

 

بنتي جاتلي في يوم تسألني: ماما يعني ايه خادمة؟!

أنا:  ده يا حبيبتي واحدة بتيجي تساعد ماما في شغل البيت وبلاش نقول خدامة دي هي مساعدة وده شغلها.

بنتي: بس أنا مش بحب الخادمات يا ماما عشان لونهم أسود!!

طبعا أنا ظهر عليا علامات التعجب والاستغراب! واتكلمت مع بنتي علي أننا مينفعش نقول كدة واحنا ربنا خلق كل واحد بشكل ولون معين لكن في النهاية المهم مين الكويس ومين الوحش وهكذا.

الجدير بالذكر ان سبب هذا السؤال هو كلام بعض صديقاتها في المدرسة و تعليقهم علي خادمتهم.

المهم الموقف ده خلاني فضلت أفكر في كيفية توصيل فكرة اختلاف الناس للأطفال واختلاف ألوانهم واشكالهم و أنه ميكنش ده وسيلة الحكم عليهم و لقيت أكتر من طريقة عجبتني:

1-طريقة البيض:

ده طريقة عجبتني جدا وهي أنك تجيبي بيضة لونها أبيض وبيضة أخري لونها بني و تخلي أولادك يشوفوها و يلاحظوا ايه الفرق بين البيضتين (الاتنين نفس النوع والاتنين بييجو من الفراخ لكن لونهم مختلف), بعد ملاحظة الفرق تكسري البيضتين وتوري أولادك أنهم من الداخل متماثلين وده بالظبط نفس الحال في البشر مختلفين في الشكل الخارجي لكن كلنا متماثلين من الداخل.

2-القصص:

طريقة القصص والحكايات ده مهمة جدا ومفيدة لتوصيل معلومات كتيرة للأطفال بطريق غير مباشر, ومن أجمل القصص في هذا الصدد هي قصة سيدنا بلال بن رباح مؤذن رسول الله صلى الله عليه وسلم، وازاي كان عبد أسود لكن في المنزلة عالي جدا لأن ربنا بيفرق بين الأشخاص بالتقوي مش بالشكل ولا باللون

3-أغاني الاطفال و الكرتون:

زمان و احنا صغيرين كان في أغاني وأفلام عن تقدير أصحاب المهن البسيطة، وفاكرة أغنية  لنيللي كانت عن مين اللي وصلنا التورتة ولازم نشكرهم اللي هم الفلاح و الطحان و اللبان و الخباز الخ..

في كارتونات كتير بتتكلم عن احترام الآخر فممكن نخلي أطفالنا يشوفوه ويعرفو كمان أهمية الأعمال البسيطة دي.

4-مساعدة المساعدة

لو كان عندك مساعدة (خادمة) في البيت لازم الاطفال يتعلموا أنهم ميعتمدوش عليها اعتماد كلي, يعني بعد اللعب يرتبوا لعبهم لوعايزين حاجة منها لازم يطلبوها بأدب زي من فضلك وشكرا و لازم الأم كمان تظهر احترام المساعدة، ده لأن الاطفال بيقلدو الأهل فلو لقوا احترام هيحترموها، لو الأب أو الأم بيعاملوها بعدم احترام الأطفال هيعملوا زيهم.

و في النهاية أكثر شئ بيوصل للأطفال معلومات مختلفة هو الكلام والمناقشة, كل ما نتكلم مع ولادنا أكتر ونوسع مداركهم كل ما هيفهموا أكتر ويتعلموا, ممكن نحس أن اللي بنقوله مش بيأثر فيهم أو نقول هم دايما بيمشو و بيحبو يقولو للأم لا و يعاندوا لكن في النهاية كل الكلام ده بيتزرع بداخلهم وبيطلع في الوقت المناسب ووقتها هتنبهري أن فعلا ولادك بيتعلمو منك وبيحفظو اللي بتقوليه ليهم و بيطبقوه كمان….

أمل فاروق