اتخانقوا بالعقل

اتخانقوا بالعقل (1)

-          محمد… أنا هقوم أساعد ماما في الطبيخ عشان ما تتعبش

-          خليكي قاعدة معايا وهي لو تعبت هتقولك ساعديني

-          مش لازم استناها لما تتعب…مش كفاية أنها شايلة العيال عني طول ما أنا في الشغل

-          يا حبيبتي هي اشتكت؟! وبعدين أنا ذنبي ايه أنك بتسيبيهم معاها.. أنا عايزك تقعدي معايا

-          ذنبك ايه؟؟ مش ولادك دول الي بيتعبوها؟

-          ما انتي الي اخترتي تشتغلي وتسيبيهم

-          ما أنا اشتغلت عشان مرتبك مش مكفينا!

-          في واحدة تقول لجوزها كده؟!

-          أصلك بتعاملني كأني نازلة الشغل بمزاجي! ولا كأنك حاسس بالمشكلة

-          …..

-          …..

-          …..

-          يعني انتي بتعايريني يعني أن أهلك بيساعدوكي! طب خليكي قاعدة عندهم يا حبيبتي خليهم ينفعوكي!!!!

-          أنا كنت متأكدة أنك بتكره أهلي! وكنت عارفة أنك هتبيعني بسرعة!

وهكذا استمرت الخناقة بين محمد وسارة حتى انتهت ماما من الطبيخ والغسيل وانتهى معها- مع مرور الوقت- الحب والإحترام في حياتهم الزوجية…

كل المتجوزين بيتخانقوا…لكن في كل مرة بعد دقائق معدودة من طرح المشكلة بنبدأ نتخانق على أسلوب خناقنا مع بعض… على طريقة كلامنا .. الراجل بيشوف رد فعل مراته تجاه المشكلة هو المشكلة نفسها والست بتشوف رد فعل جوزها تجاه أحاسيسها هو المشكلة! وكل ما بنطول في الجدال المشكلة بتكبروالصلح بيكون أصعب!

السبب في ده أننا كراجل وست مش فاهمين بعض… وكل واحد بأسلوبه بيساهم من غير ما يقصد في تضخيم الموضوع… عشان كده هدي لكم شوية نصائح تطبقوها في الجواز…

بالنسبة للزوجات وقت الخناق:

1- عايزاكي دايما تعلي صوتك عليه وتستخدمي مصطلحات عاطفية “انت مش بتحب أهلي” “انت بتجرحني” “انت بعتني”… سيبك من نظرية ان جوزك مش هيعرف يربط بين المشكلة وبين مشاعرك الجياشة دي… أو انه هيقلب عليكي الترابيزة لأنك عليتي صوتك وده عيب! ولا يهمك…

2- أبدأي بقى اشتكي من حاجات كتير ملهاش علاقة ببعضها (من وجهة نظره) في نفس الوقت…يعني بدل ما تقولي له “تعالى نتفق على يوم نخرج فيه مع بعض لوحدنا”…الأفضل أنك تقولي له “انت أصلا مبتحبنيش وعلى طول سايبني وبتتفرج على التليفزيون وحتى اما طلبت منك جالاكسي جبت لي سنيكرس”

3- دايما توقعي منه رد فعل أنثوي “ليه مبتحكليش على أحاسيسك…ليه مش بترغي معايا كتير…انت مخبي عني ايه”… كأنك بتكلمي صاحبتك بالظبط…انتي عارفة طبعا ان الراجل بيحب الرغي والحكايات عكس الست الي بتميل أكتر للأفعال والقرارات

 4- قارنيه بأي شخص تاني حتى لو كان أبوه… وبكده تضمني انك حسستيه انه مالي عينك ميه ميه

5- اوعي تدي له فرصة يتكلم…هو هيقعد يشتكي هو كمان؟؟ رجالة ايه دي!

6- طلعي له دايما قصصه السودا الي عملها معاكي قبل كده… اوعي تنسيها! خليكي واعية كده ودايما خزني في الأرشيف

7- وأخيرا وليس آخرا…اوعي تتصالحي غير لما يندم ويعتذر ويتغير ويجيب لك خاتم سوليتر هدية…

أما بالنسبة للأزواج…فهنخلي نصايحه للمقال الجاي إن شاء الله… وهنيالك يا فاعل الخير والثواب

هبه السواح

مديرة مؤسسة فاميليا للعلاقات الأسرية

مدرب معتمد من مؤسسة مارس فينوس ومؤسسة التهذيب الإيجابي بالولايات المتحدة الامريكية