أنت إيه و أنت تقدر تعمل إيه؟
سارة سليمان

Self esteem is a judgment, Self confidence is a feeling!!

عجبني أوي في فكر مايكل هول إنه بيفرق بين الإتنين! بيفرق بين الحكم اللي منبني على فكر في العقل إن الواحد يكون عنده “تقدير للذات” (self esteem) و بين ان الواحد يكون عنده “ثقة في النفس” (self confidence). أعتقد إن إحنا عمرنا أصلا ما كنا بنفرق بينهم و غالبا بنخلط دايما الإتنين مع بعض و بنكتفي بالتفكير و الكلام عن “الثقة بالنفس”.

زي ماقلت الثقة بالنفس ده شعور: انا واثق من نفسي, واثق إني أقدر أسوق, واثقة إني باعرف أطبخ. بالتالي الشعور ده بيتبني عليه “فعل”. إني فعلا أستخدم مهاراتي و أسوق أو إني فعلا أفنن و أطبخ لبيتي و أولادي. الفعل ده لأننا بشر عاديين ممكن أحيانا يصيب و ممكن أحيانا يخطئ. يعني انا ممكن مرات وانا سايقة أعدي السرعة المسموحة و آخد مخالفة, و مرات ممكن أبقى عايزة أطبخ حاجة حلوة أوي بس تتحرق مني. إذا الفعل ده شئ أنا باحاول فيه و باجتهد فيه جدا لكن هو دايما عرضه للنجاح أو الفشل. إحساسي إني أقدر مش معناه إني لازم أنجح, بالعكس أنا أقدر وواثق من قدراتي اللي بنائا عليها حاجرب مرة و أفشل فأجرب تاني و هكذا.

لكن تقدير الذات أو ال (self esteem)  ده حكم الإنسان بيحكم بيه على نفسه. يا إما الإنسان يقدر نفسه و يحترم ذاته يا إما العكس. الإنسان اللي بيحترم ذاته و بيقدر ذاته ده إنسان عنده وعي و إدراك بهو مين و قيمته إيه. كل إنسان ذو قيمة, مفيش إنسان مالهوش قيمة أو مثلا قيمة واحد أعلى من قيمة التاني. أنت إنسان فإذا انت أعلى و أسمى و أرقى من إن تقديرك و إحترامك لذاتك يتهز. بالتالي تقدير الذات اللي هو حاجة سامية جدا و رفيعة المقام جدا دي المفروض تكون دايما فوق, دايما عالية, دايما في مقام مرتفع. إوعى أبدا تقديرك لذاتك أو إحترامك لذاتك يتهز, هو ده أغلى مايملكه الإنسان: إنك إنسان ذو عقل و فكر و قدرات و مهارات. ممكن أتصور إن واحد ثقته في نفسه تتهز, إنه يخاف من الفشل أو يخاف من المحاولة لأي سبب كان, لكن لايمكن أتصور أي حد تقديره أو إحترامه لذاته يتهز. تخيلوا المعنى ده كويس: إن واحد يبطل يحترم إنه إنسان؟! إن واحد مايفرش معاه إنه موجود, إنه كائن! ده يعيش إزاي؟ أتصور ساعتها إن إنسان بالفكر ده ممكن حتى يختار إنه يبطل يعيش!!

عشان كده لما قرأت في الفكر ده, فكرة التفرقة بين تقدير الذات و الثقة بالنفس حسيت بالإيجابية: إيه يعني إن الواحد يفشل؟ إيه يعني إني ما أنجحش من أول مرة, عادي, حاجرب تاني و تالت و حاكون فخورة إني باحاول, و حتفضل دايما عندي الفكرة إني إنسان! انا كائن موجود حي عايش وسط الناس له قيمة و له فكر إحترامه. بالتالي أقدر دايما أجرب و أقدر دايما أخطئ و ده عادي و مفهوم بالنسبة لي, لأن تقديري لذاتي عمره ما بيتهز, و بالتالي ثقتي في نفسي حتكون دايما عالية! بالفكرة دي و الحياة بالأسلوب ده هو ده اللي يصنع الإصرار و الإستمرار. الحياة بالطريقة دي هي مصدر الإيجابية, هي مصدر النجاح. تخيلوا لو ربينا أولادنا على كده, إن أنت لاتقدر بثمن, أنت محترم ماحييت, إغلط مش مهم, لما تغلط حتتعلم و لما تجرب حتفهم. تخيلوا الأولاد دول حيتبني إيه في عقولهم؟ حينتج عنهم إيه؟ حينتج عنهم عزم, قوة, إيجابية, إصرار, نجاح…وأكتر!

فرق كويس بين أنت إيه, و أنت تقدر تعمل إيه!!

إنت إيه؟ إنت إنسان. إنت تقدر تعمل إيه؟ إنت تقدر تعمل حاجات كتير, منها إنك تحاول فتفشل و منها إنك تحاول فتنجح. صدقني حتفرق!

فتكم بعافيه

سارة سليمان

مدرب علاقات زوجية معتمد و ممارس معتمد في ال NLP  و APG