share
.
من ٨ سنين و أكتر و أنا بلاحظ ظاهر غريبة فى النادى أو أماكن التمارين الرياضية… خير اللهم اجعله خير على شهر 5 و 6 النادى يتملى و
الأطفال أحباب الله فى كل مكان و زحمة فى كل الرياضات و كل المواعيد زحمة…قلت لنفسى و الله حاجه تفرح برده العقل السليم فى الجسم السليم و دى أمهات المستقبل و أيوه هى دى التربية و ده الجيل الصح الفَلته .
و سبحان الله بقدرة قادر تلاقى على شهر 9 و 10 النادى رجع فاضى و هدوووووء و التمارين أصبح فيها ربع عدد الأطفال…طيب يا جماعه فين العقل السليم و الجسم السليم ؟؟؟ فين الأمهات اللى القمرات اللى كانوا هنا ؟؟؟؟؟؟ فين أحباب الله ؟؟؟؟؟
و فضلت أسأل لحد ما لقيت إجماع على إجابه بالنسبالى كانت صدمة و هى ؛
“أصل الدراسة بدأت و يا دوب الوقت على أد المذاكرة و التعليم أهم“….
بجد صُدمت !
تعالوا نتناقش بموضوعية و هما حلين يا هتقتنعوا يا هتقتنعوا : )
-
مفيش شك إن الدراسة مهمة مع إن التعليم بتاعتنا عايز يتنسف بس هنمشيها.
-
الدراسة دى عمود من عواميد الحياة لكن فى عواميد تانية كتير منها (الرياضة – العبادات – الإجتماعيات – الهوايات )…لو بنينا أشيك مبنى على عمود و احد هيقع لازم مجموعة كاملة من العواميد تشيله علشان الحمولة تتوزع عليهم .
-
طيب نعمل إيه فى الوقت الضيق و المذاكرة ؟؟؟ بصى حبيبتى الأم دورنا إننا نساعد ولادنا و نعلمهم مقومات النجاح يعنى أعلمه ينظم وقته وحياته أعلمه أن فى وقت للمذاكرة ووقت للتمرين و ده بأهمية المذاكرة بالظبط مفيش غياب منه و وقت يوم الجمعة للزيارات العائلية و وقت لحفظ القرأن و برده دوول بأهمية المذاكرة بالظبط .
-
نجاحك إنك تساعدى إبنك يوصل للرياضة اللى يلاقى نفسه فيها عادى ممكن يجرب رياضة و اتنين و خمسة لحد ما يلاقى نفسه فى فى واحدة ووقتها من حُبه للرياضة هيركز فى مدرسته علشان يرجع يعمل واحباته بسرعه و يجرى على تمرينه .
-
حقيقة جداً : معظم المتفوقين دراسياً متفوقين رياضياً لأنهم إتعلموا إنهم لازم يفصلوا علشان يؤدوا بكفاءه أعلى .
-
لو إبنك مستواه متوسط دراسياً و متميز رياضيا هيحس إنه متفوق فى حاجة و ليه قيمة مش إنه ضعيف دراسيا يبقى خلاص هو كده فاشل فى كل حاجة و ممكن نلاقيه فعلا جاله إنهيار عصبى بعد نتيجة الثانوية لأن التعليم كان المحور الوحيد لحياته! لأ طبعاً الحياة فيها جوانب تانية و ده هيديه ثقه فى نفسه و تَقَبُل لإمكانياته .
-
طيب وقت الإمتحانات أعمل إيه ؟ عادى زى أى وقت تانى هو منظم نفسه و مذاكرته من أول يوم عندنا مثلا ساعتين مذاكرة خلصوا يالا على التمرين أيوه ليلة الإمتحان عاااااااادى قلنا الدراسة زى الرياضة زى الهوايات و العبادات و غيره .
-
الرياضة بتعلم الولاد الإعتماد على نفسهم و الإستقلال و الثقة بالنفس و تقبل الهزيمة و السعى للنجاح و المكسب و إحترام القوانين و المرؤه و مساعدة غيرهم و الألتزام و تنظيم الوقت و غير كده كتيييييييير .
-
على فكره من أهم فوايد الرياضة إنها هتعلمهم يشتغلوا تحت ضغط بُكره هيكون راجل كبير و مسؤل و أكيد هيكون عنده ضغط شغل وقتها مش هيكون متعصب و مش عارف يسيطر على نفسه و متوتر و منكد على زمايله و مراته و مش طايق مُديره بالعكس هيكون متعود من وهو صغير ينظم وقته و يقسم شغله و يشتغل على حسب الجدول اللى عامله لنفسه و هيكون فاهم إنها مرحله و هتعدى .
كل دى مهارات و خبرات حياتيه مهمه أوى فى حياتهم و هتفرق فى شخصياتهم.
كلمتين بينى وبينك : و قت الفراغ + الطاقة = كارثة حقيقية و حذرنا منها النبى (ص) لو ابنك ما دخلش رياضة من بدرى و بدأ يكبر فيها و يدخل فريق هيجى على بداية المراهقة 8 – 9 سنوات هيجننك من التطلعات و عنده طاقة و فراغ و ده لحد ١٩ سنة هتبقى قلقانه من السجاير و المخدرات و الصحوبية و الشهوات فالأفضل ليكى و ليه إنه يتشغل قى تمرينه و هيروح من كتر الإرهاق هتكون أقصى أمانيه إنه ينام و كده تكونى قدرتى تملى وقته فى حاجة مفيدة ليه ووفرتى القلق و الصدام اللى هيحصل بينكوا.
10. نيجى بئه لدور الأم المثاليه فعلا أيوا حضرتك بالظبط كده … دورك أنك تختارى مواعيد مناسبة قدر المستطاع فى الدراسة بحيث يناموا كويس و تكونى محضرة غداهم من بدرى و محضرة اللانش بوكس اللى هتاخديه ليهم فيها الفاكهة بتاعتهم أو الحاجة الحلوة اللى هياكلوها بعد التمرين و طبعا تكون فيها قيمة غذائية عالية ومن إيديكى الحلوة و تكونى مساعداهم فى تجهيز لبسهم علشان أول ما يرجعوا ياخدوا الدش بتاعهم.
أنتى كمان متنسيش تستثمرى وقتك و أنتى بتتفرجى على ولادك فى التمرين ممكن تستغفرى أو تقرأى الورد بتاعك أو تقرأى كتاب مفيد لكن مهم اوى تتفرجى على ولادك وتشجعيهم و ممكن تصوريهم و تعمللهم فيديو ممتع و يكون مفجأءه حلوه ليهم : )
حبيبتى الأم صاحبة الرؤية المتميزة و الفكر الراقى متنسيش تجددى نيتك فى تربية أولادك و عددى النوايا.
ملحوظة حقيقية : كل سنة بعد ما التمرين يرجع يتملى بالأولاد فى بداية الصيف بسأل الولاد على درجاتهم الدراسيةو فى كل الرياضات اللى سألت الولاد فيها أصحاب أعلى درجات هما اللى واظبوا على الرياضة صيف شتا حقيقة و الله على مدار السنين وفعلاً شخصياتهم متميزة جداً عن باقى الأطفال .
حبيبتى إستمتعى بكل وقت مع ولادك فى دراسة و إجازة و فى سفر و حتى فى الأزمات إفتكرى إنها مرحلة و هتعدى المهم نحاول يكون لينا دايماً ذكريات حلوة معاهم فى كل مرحلة.
.
ساره مصطفى هاشم
مدربة معتمدة فى التربية الإيجابية
[اقرئي أيضا: أنا و بنتي و واجب العربي]
[اقرئي أيضا: أبنائنا و الأجازة الصيفية]
[اقرئي أيضا: منيو اللانش بوكس]
[اقرئي أيضا: خروج الجيل عن السيطرة]
[اقرئي أيضا: 5 قواعد للتعامل مع الطفل العنيد]
[اقرئي أيضا: الhome schooling – قصة حقيقية]
