share

كتبت نهال هشام (le garage 36):

نتكلم عن البشرة الجافة بقى 🙂 أو ازاي نتعامل بشكل يومي مع الأجزاء الجافة في بشرتنا حتى لو بشرتنا مركبة .. هنتكلم ازاي نتصرف مع الجزء الدهني في الT-zone.

البشرة الجافة ممكن تتعرفي عليها بأنها عكس مشكلة المسام الواسعة في البشرة الدهنية، المسام بتاعتها ماسكة أوي في بعض لدرجة أنها ممكن تلاقي مناطق بارزة شوية بتتسمى (crocodile skin) و غالبا هنحسيها اخدت طبع باهت و ممكن تلاقي مناطق ناشفة و مقشفة بشكل يشبه القشرة شوية.

الفكرة في البشرة الجافة هي الترطيب دايما، بشكل داخلي زي ما بتهتمي بالخارجي.  يعني ايه داخلي؟… يعني تشوفي الجفاف ده ناتج عن ايه و تحاولي تحليه، الحلول الداخلية إنك بتعالجي النقص بشرب كميات مية حوالي 8 كوبايات يوميا، و تعوضي الجفاف ده بانك تاكلي أكل فيه Omega 3 و أحماض دهنية زي أنواع من المكسرات. كمان أنواع معينة من السمك زي السلمون و السردين، و زيت دوار الشمس و من المكسرات زي الجوز.

حاولي تجيبي حبوب مضادة للأكسدة من الصيدلية، لازم تهتمي بجسمك من جوا بانتظام زي ما بتهتمي بيه من بره.

نصائح خاصة بالبشرة الجافة:

• حاولي تقللي من الاستحمام بالمية السخنة، و تحاولي تستغني عنه بمية دافية.. و لما تغسلي وشك يكون بمية باردة في الطبيعي..لأن المية السخنة لفترات طويلة بتجفف البشرة. كمان حاولي تقتصري في المرة الواحدة على 10-15 دقيقة لو المية سخنة.
• استخدمي منظف يومي مش قوي على البشرة، أو صابون من غير كيماويات. خدي بالك إن بشرتك الجافة ممكن تتأثر من السكربات التقيلة (مقشر –  scrub) لو بشكل يومي، و ممكن تستبدليها بوصفات منزلية طبيعية خفيفة لأنه إزالة الجلد الميت دي حاجة دورية، بس اعرفي احتياج بشرتك للعملية دي كل قد ايه.. و ماتهليكيهاش.
• استخدمي المرطب بعد ما تتنشفي على طول بعد الاستحمام في فترة لا تزيد عن 3-5 دقايق علشان جسمك يحتفظ برطوبته لأطول فترة ممكنة.

المواد اللي تدوري عليها داخل أي كريم مرطب علشان تعرفي اذا كان مناسب لبشرتك و يقدر يساعدها ولا لأ, مش لازام تشتري كريم غالي مادام فيه المواد دي:

• Ceramides : بيساعد البشرة تحتفظ بالمية و بيديها مظهر أملس.
• Dimethicone And Glycerin: بتسحب المية لجوا الجلد و تحتفظ بيها
• Hyaluronic ِِAcid: بيساعد الجلدإانه يحتفظ بالمية.
• Lanolin, Mineral Oil, And Petroleum Jelly: بتختفظ بالمية جوا الجلد بعد خروجك من الحمام.

و طبعاً لازم تستخدمي عامل حماية SPF15+ سواء للوجه أو للجسم للمناطق المعرضة للشمس، علشان تحميها من الجفاف.

نتكلم عن الروتين اليومي للبشرة الجافة:

1) الصبح أول حاجة تستخدمي غسول وش يكون مخصص لنوع بشرتك gentle cleanser و يفضل لو كان الكيماويات فيه قليلة على قد ما تقدري. و تغسلي وشط بمية دافية أو باردة.

2) بتسخدمي تونر للبشرة، و يفضل لو بدلتيه بمية ورد لأنها تونر طبيعي و مافيهاش كيماويات. استخدام التونر بيساعد المرطب أنه يتخلل في المسام أبشكل حسن.

3) بيبقى عندك نوعين مرطب، مرطب كُلي.. سواء لوشن خفيف أو مرطب أقوى شوية وده  أنا بحب استخدم Vaseline Coacoa Butter أو Nivea Shea butter.

و النوع التاني بيبقى مرطب قوي للنهار و غالبا بيبقى فيه عامل حماية من الشمس. لو بشرتك مركبة و المرطب الكامل بيزيد في دهنية مناطق معينة، و ده بيختلف من بنت لبنت، ممكن تجربي تستخدمي زيت شجر الشاي على الT-zone علشان تمتص الدهون و تكتفي باللوشن الخفيف المرطب بس تحطي المركز على الأجزاء الجافة.

4) لو بتحبي تحطي فاونديشن، حاولي تبدليه بTinted Moisturizer، بيبقى غير ال BB cream مرطب و متضاف عليه لون يماشي بشرتك.

5) طوال اليوم حاولي تحافظي على ,qu المرطب الكُلّي اللي يبقى معاكي في شنطتك و تحطيه على ايديكي و اي جزء باين من بشرتك علشان تحافظي على الترطيب، تشربي مية كتير.. و تاكلي أكل فيه فواكه و خضار كتير لأنهم فيها مضادات أكسدة من اللي بتساعد ضد التجاعيد و تحافظ على الرطوبة.

6) قبل ما تنامي تبلّي وشك بمية دافية ( فاترة) تستخدمي مزيل مكياج مركب.. زي nivea cleansing milk – makeup remover و تغسلي وشك بالغسول بتاع الصبح.

7) قبل ما تنامي تحطي مرطب تقيل لقبل النوم، علشان بيساعد على تغذية وشك طوال فترة الليل.

أما عن الروتين الأسبوعي للبشرة الجافة:

1) روتينك هيختلف لأن وشك مش هينفع تستخدميله سكربات تقيلة، فيا إما تمشي فوطة على وشك علشان تزيل الجلد الميت او تعملي سكربات منزلية خفيفة بالسكر البني، حاولي تحطي في بالك لو بشرتك مركبة هتتعاملي بمنطقين مع الجزئية الجافة بالراحة و بالفوطة، و الجزء الدهني و خصوصا حوالين المناخير بسكرب كويس و ممكن فرشة سكرب.. على حسب احتياجك الشخصي.

2) انتي بتحددي احتياج بشرتك لحمام البخار كل قد ايه، لو بشرتك مركبة غالبا هتحتاجي حمام البخار أكتر من اللي بشرتهم جافة بس، لأنه غصب عنك هيبقى فيه نسبة زيوت دهنية عند الT-Zone و بتتكدس مع الوقت.

3) يفضل لو تستخدمي ماسك مرطب بشكل أسبوعي، على حسب احتياج بشرتك.. مش لازم تعملي دايما معاها حمام بخار لو بشرتك مش مركبة ممكن تكتفي بمرة في ال3 اسابيع أو الشهر. ممكن تستخدمي ماسكات من منتجات مختلفة خاصة بالترطيب، او تعملي ماسكات منزلية بوصفات مخصوصة للبشرة الجافة.

اللي بشرتهم مركبة.. يتعاملوا مع الT-zone اكنها دهنية و دايما يجيبوا ماسكات تقشير، peel OFF زي ماسك هيمالايا بالخيار و اللوز، من أحسن ماسكات التقشير اللي جربتها،، لو تقيل على الجزء الجافة من وشك، استخدمي بس للT-zone و بعدين استخدمي ماسك مرطب على الباقي. من الماسكات الكويسة برضة ماسك العنب او ماسك الرمان من Oriflame و هم الاتنين فيهم مضادات للأكسدة و ديه نقطة Bonus لأي واحدة خايفة من تجاعيد مبكرة خصوصا بسبب البشرة الجافة.