0
38
كل فترة الموسم بيتغير و الموضة كمان بتتغير معاه. لو السنة دي القصير موضة, السنة اللي بعدها الطويل موضة و لو السنة دي اللون الدارج هو الأخضر هتلاقي اللي بعدها بقى الأصفر و هكذا دواليك . كل سنة قبل كل موسم نسمع و نتفرج على أحدث صيحات الموضة و ايه اللي لازم يبقى في دولابك دلوقتي علشان متبقيش ” دي موديه”.
بس هو فعلا اللي يلييق عليكي بالضرورة هيليق عليا؟ و لا مثلا هيبقى شكلي زي الموديل لو لبست اللبس اللي هي لابساه؟؟
طبعا الاجابة على الأسئلة دي هي لا. كل جسم , شكل , بشرة ليها اللي يليق عليها و يجملها. و برضو من المهم نحط في بالنا ان الموضة دي صناعة أولا و أخيرا و همهم زيادة المبيعات و المكسب.
فمتكونيش نسخة مكررة من مجلة أو فنانة أو موديل, خلي عندك “طابعك الخاص” و اختيارك اللي يليق على شخصيتك و شكلك .
هديكي شوية أفكار ممكن تساعدك على تحديد اللي يليق بيكي:
أولا : لو في لون عاجبك و دارج الايام دي, جربيه عليكي الأول , قربيه من بشرتك و أسالي حد معاكي لو هو فعلا شكله حلو عليكي. لو طلع اللون مش لايق و لسة عايزة تلبسيه ممكن تحطيه كحزام او أكسسوار أو في الحذاء أو الشنطة.
ثانيا : لو عايزة تباني أطول ممكن تجربي تلبسي الحاجات اللي مخططة بالورب (اللي موضة دلوقتي على فكرة و متوافرة في السوق) و دي بتدي ايحاء بالطول.
ثالثا: لو في منطقة في جسمك فيها وزن زايد و عايزة تخبيها ممكن تجربي تكنيك ال Colour Blocking بحيث ان المنطقة تقسم لثلاث أقسام بالطول و يكون الجنبين من اللون الاسود و الجزء اللي في النص مختلف (بس ميكونش فاتح قوي). دا بيدي احساس بالرفع.
أخيرا: تأكدي انك كل ما تمتعتي بالبساطة و الراحة في اللي انتي لابساه كل ما ثقتك زادت في نفسك و كل ما كان شكلك أحلى =)
دانا التاجي
مصصمة أزياء
**يقدم لكِ فريق عمل مج لاتيه مقالات لذيذة في مجال الموضة و الأناقة حتي يتسني لكِ الظهور بشكل أنيق بين صديقاتك في مناسبتكن الخاصة أو في بيتك أمام زوجك و محارمك مع وجوب محافظتك علي الحجاب الشرعي في الأماكن العامة. مع تمنياتنا لك بأناقة دائمة
منى
ممتاااااااااااز