العايقة!

أنا اللي كانوا مسمييني عايقة ورايقة .. أنا اللي كنت بقفل ٩ ساعات نوم متواصل .. أنا اللي كنت بستحمى في ساعة ونص ويا ويله اللي يخبط على باب الحمام .. أنا اللي كنت بروح للكوافير كل أسبوع وبغير لون شعري كل شهرين .. أنا اللي كانت مكالمتي لصاحبتي مدتها ساعتين .. كان مستحيل حد يشوفني بنفس اللبس مرتين .. كنت لو طلعلي حباية في وشي مخرجش من البيت ٣ أيام .. كنت مثال للرقة وبتكلم بالهمس .. كنت باخد المرتب من هنا واشتري بيه كله لبس وميك اب من هنا .. كنت بروح الچيم كل يوم .. كنت لو زدت كيلو أضرب عن الطعام لغاية ما اخس .. لو معزومة على فرح بحضر هلبس إيه قبلها بشهرين .. مينفعش يعدي أسبوع من غير ما أخرج مع صحباتي ونقضي اليوم كله مع بعض ..ببص في المراية مش أقل من ٢٠ مرة في اليوم .. المبرد والملقاط أصدقائي المقربين .. أرمي لبسي اللي محتاج يتغسل عالكرسي يرجعلي تاني يوم مغسول ومكوي ..بدخل المطبخ بس عشان أشرب ميه .. علاقتي بالطبق اللي باكل فيه بتنتهي مع آخر معلقة ..في أجهزة في البيت معرفش بتشتغل ازاي زي الغسالة والمكنسة لكن السيشوار والبيبي ليس كنت خبرة فيهم ……كنت وكنت وكنت…
…..
……..
……….
أنا اللي بصحى كل ساعتين .. لو نمت ٤ ساعات متواصل بعمل لولولوليييي فرح ..أنا اللي بستحمى في ٣ دقائق على أصوات خبط وترزيع عالباب .. أنا اللي بسرح شعري لما يطلع عالجيران .. وعلاقتي بالصبغة هي إعلان هند صبري .. أنا اللي لو عرفت أرد على صاحبتي لازم المكالمة تتقطع في النص وأقولها نتكلم تاني وعمرنا ما بنتكلم تاني ..أنا اللي مش فاكرة اشتريت لبس آخر مرة امتى؟؟؟ يمكن في العيد الصغير؟؟ ببص في المراية مرة واحدة في اليوم وأنا بغسل سناني ( ده لو افتكرت اغسلها) .. سمعت أن في جيران في الشارع اللي ورا اللي ورانا لسه مسمعوش صوتي وأنا بذاكر لبنتي ..كرهت الميك اب وبطلت استعمله لما عرفت أنه مضر بالبشرة ؛)
بمارس التمارين الرياضية كل يوم، تمرين الكنس، تمرين المسح، تمرين نشر الغسيل وتطبيقه وطبعاً التمرين الأشهر على الإطلاق اللي بيقوي عضلات الفك.. عرفتوووه؟؟؟ برافو، تمرين أكل الأخضر واليابس .. طبعاً مش محتاجة أقول اني بطلت أحضر أفراح بعد اللي حصلي آخر مرة لما ابني عمل بيبي عالكرسي بتاع العروسة .. ودلوقتي خروجاتي الأساسية هي تمارين ولادي .. في ممتلكات ضاعت مني تحت الأنقاض وبطلت أدور عليها زي المبرد والملقاط والمراية اللي بتكبر دي عارفينها؟؟ وفي حاجات في البيت علاقتي بقت وطيدة بيها لدرجة انها أول ما تشوفني تاخدني بالحضن زي حوض المطبخ بمواعينه….

أنا صحيح حياتي اتغيرت ١٨٠ درجة بس أهم وأحلى حاجة حصلتلي في حياتي هي أني بقيت أم…. وده اللي بيديني القوة إني أكمل وبيديني أمل في بكرة وبنسى أي تعب وإرهاق مع ابتسامة من ولادي أو حضن بحس معاه أني حضنت الدنيا كلها ..كمان التغيير ده خلاني أحس بقيمة أقل الأشياء واتبسط بيها أوووي زي أني أعمل شعري أو اشتري بلوزة جديدة أو أني أصحى الصبح ألاقي جوزي نشر الغسيل أو أن بنتي تقولي بحبك .. أو أني أشرب مج اللاتيه بتاعي وهو سخن.

ممكن تكوني مش بتعيشي أجمل أيامك بس تأكدي إن في حاجات جميلة في كل يوم بتعيشيه اتعودي انك تركزي عالحاجات الجميلة دي حتى لو كانت صغيرة وقتها هتحسي بالرضا والسعادة…

نسرين عبد الوهاب