أقول لابني شاطر ولا بلاش؟

أقول لابني شاطر ولا بلاش؟

أقول لابني شاطر ولا بلاش
أقول لابني شاطر ولا بلاش؟ - مصدر الصورة: Cody Long @ Flickr
shareEmail this to someonePin on Pinterest0Share on Google+0Tweet about this on TwitterShare on Facebook0

كتبت د. آيات فارس أبو الفضل (مستشار أسري وتربوي معتمد دوليا):
الأم عايزة ابنها يبقى كريم …

بحيث إنه يكرم الضيوف ويكرم أصحابه ويكرم أهل بيته …

وكمان عايزاه يبقى صادق يقول الصدق دايما …

ومش كده وبس عايزاه يبقى قارئ .. كل ما يجي عليه وقت فراغ يمسك كتاب ويقرأ ويستفيد من وقته .

كانت الأم كل ما ابنها يعمل أي حاجة من الحاجات اللي فاتت دي .. تقوله برافو ، شاطر ، أنت ولد رائع ، حبيبي ليس له مثيل، هي في الحقيقة كانت بتعتقد إنها بتشجعه أنه يستمر على نفس الصفات اللي هي قالت له الكلمات دي عليها، لكنها في الحقيقة عملت مدمر تربوي كبير.

وعلشان نعرف المدمر التربوي خلونا كمان نعرف إيه هو المدح وإيه هو التشجيع …

الكلام اللي الأم قالته لابنها كانت نتيجته إيه ؟؟؟

1- الابن شاف أنه حلو قوي وكويس قوي ومفيش حد زيه ، فده حيخليه :

أ- يبقى مغرور أصله الشاطر اللي مافيش حد زيه .

ب- ما يحاولش يبقى أفضل من المستوى اللي وصله ، أصل كلمات ماما بتدل على إنه وصل لأعلى مستوى من التميز .

2- لو الابن فاقد الثقة في نفسه من الأساس وكل شوية يسمع الكلام ده ، حيحصل إيه :

أ- حيحاول يداري عيوبه ، فيعيش مكلف نفسه بمهمة فوق طاقته ويعيش مهموم .

ب- حيقول ماما بتضحك علي أنا مش متميز قوي للدرجة دي …

طب لو عايز أمدح إبني أو أشجعه ممكن أعمل إيه ..؟؟؟

أولا نعرف الفرق بين المدح التربوي والتشجيع التربوي ..

المدح التربوي اللي بيكون بعد ما الطفل عمل الحاجة الكويسة خلاص .

أما التشجيع فيكون قبلها أو أثنائها …

علشان أمدح إبني حتكون عبارة المدح مكونة من :

وصف للسلوك الإيجابي اللي الطفل قام بيه مش وصف للطفل نفسه + تسمية للسلوك الإيجابي ده + إخبار الطفل أن من حقه أن يفتخر بنفسه .

ليه كل ده ؟؟؟؟ .

أولا وصف السلوك مش وصف الطفل علشان نبعد عن النتايج السلبية اللي حصلت من المدمر اللي فوق .

ثانيا ليه بسمي السلوك : علشان الطفل يعرف ويفهم إيه هو السلوك التربوي اللي بيتمدح علشانه وبالتالي يكرره .

ثالثا : ليه بقوله “من حقك تكون فخور بنفسك” مش “أنا فخوره بيك” ، علشان أخلي فخر الطفل نابع من داخله ومن سلوكه الكويس مش من نظرة الناس ليه ….

أما التشجيع ، فبيكون عبارة عن إرسال رسالة للطفل إنك واثق فيه في أنه حيقوم بالسلوك الإيجابي المطلوب منه .

خلونا ندي أمثلة على الجمل اللي فوق :::

الأم عايزة ابنها يبقى بيحب القراءة :

مدح بعد أن قرأ :

ماشاء الله اللهم بارك ، أنا شايفاك قريت القصة بتركيز وحكيتهالي كمان ، ده اسمه حب العلم والقراءه ، أنت المفروض تكون فخور بنفسك .

تشجيع قبل القراءه أو أثنائها :

أنا واثق أنك حتقرأ الكتاب ده وتخلصه وأنت مستمتع بيه .

ده مثال تطبيقي على الفكرة اللي ذكرناها، والكلمة الحلوة مهما كانت بسيطة بتفرق خصوصا مع الطفل ، عشان كده لازم كلنا ننتبه لكل حاجة نقولها لأولادنا وكل تصرف نتصرفه أدامهم عشان نكون قدوة حسنة لهم.

دمتم بخير  …