دوكان دايت حمية الأمراء – كيف فقد زوجي 20 كيلو في...

دوكان دايت حمية الأمراء – كيف فقد زوجي 20 كيلو في ثلاثة أشهر

نظام حمية غذائية رجيم
نظام حمية غذائية - رجيم الأمراء Photo credit: Bigstock
shareEmail this to someonePin on Pinterest0Share on Google+0Tweet about this on TwitterShare on Facebook0

كتبت د. علياء عبد الرحيم:

 

انطلاقا من حب لأخيك ماتحب لنفسك عاوزة اقولكم على نظام غذائي رائع للدايت.. بصراحة أنا جربته على زوجي، والحمدلله خسست زوجي 20 كيلو في ثلاثة أشهر عشان كده حبيت أفيدكم بالتجربة دي.

 

أنا ذاكرت كتيرالنظام ده عشان أقدر أطبقه معاه والحمدلله ربنا مضيعش تعبي، وتقريبا قلت لكل اللي أعرفهم عن النظام ده.

النظام اسمه دوكان دايت (حمية الأمراء) واتعرف جدا بعد ما اتبعته كيت ميدلتون دوقه كامبريدج واتنسفت قبل فرحها، النظام ده مينفعش للحوامل أو المرضعات أو مرضى الكلي لأنه بيعتمد اعتماد كبيير علي البروتين، والدايت دي مناسبة جدا للي عندهم خمول ف الغدة الدرقية.

الأكل بيكون بكميات مفتوحة وفي أي وقت بس الأهم الالتزام بأنواع الأكل المحددة واللي هكتبهالكم.

  • طريقة عمله:

فكرة النظام بتدور حوالين إن السعرات اللي بناخدها من البروتينات أقل بكتير من اللي في الكربوهيدرات والدهون وبالتالي الجسم هيحتاج يحرق من مخزونه من الدهون و ده الي بيخسس.

تجربتي مع زوجي:

* ملحوظة أنا طبيبة أسنان مش أخصائية تغذية عشان محدش يفهم غلط ولو حد عنده مشكلة صحية وفكر في الدايت ده لازم يستشير الطبيب الي متابع معاه.

  • المرحلة الأولى ( الهجوم):

تعتمد اعتماد كامل علي البروتينات : مدتها من ثلاثة لستة أيام حسب الوزن الكلي المراد نزوله يعني لو عاوزين تخسوا أكتر من 15 كيلو هتعملوا المرحلة دي لمدة ست أيام أما لو أقل من 15 كيلو هتتعمل 3 ايام فقط.

الأكل المسموح بيه فيها: جميع منتجات الألبان الخالية من الدسم زي الزبادي خالي الدسم والجبنة القريش والحليب خالي الدسم. مسموح بالبيض بس اللي عنده كوليسترول عالي لازم مياكلش بيض كتير أو ياكل البياض فقط. الدجاج مشوي أو مسلوق، اللحوم الحمراء مشوية أو مسلوقة عدا الضاني، كل البحريات سمك جمبري تونة في ماء وليس زيت، كاليماري وسلمون. الأكل مسلوق أو مشوي فقط مفيش خضار مفيش خبز ولا فاكهة ولا سكر إلا السكر الدايت ومسموح باستخدام البصل ف التتبيل سواء اللحمة أو الفراخ أو عمل الكفتة المشوية. للتحلية ممكن جيلي دايت الي بيكون من غير سكر بيتباع في الهايبر ماركت. ممكن كريم كراميل بسكر دايت وحليب خالي الدسم و بيض يتضربوا مع بعض و يدخلوا الفرن. ممكن زبادي عليه سكر دايت أو ملعقة جيلي دايت عشان تديله نكهة. مسموح شرب النيسكافيه بسكر دايت والشاي بحليب وكمان البيبسي الدايت كان واحده في اليوم. مسموح بتناول البسطرمة ومرتديلا الديك الرومي وشرايح الجبنة خالية الدسم بعملها سناك كدة شريحة مرتديلا جواها شريحة جبنة وألفهم وأقفلهم بخلة أسنان بتبقي لذيذة. ممكن تناول اللبان خالي السكر زي اكسترا. بلاش سهر عشان السهر بيجوع. لازم شرب 2 لتر مياة علي الأقل مش بس للدايت ده للتخلص من الأحماض الأمينية الكتير الي بينتجها البروتين. يفضل شرب الشاي الأخضر 3 مرات في اليوم وأخر وجبة يستحسن تكون قبل النوم بساعتين علي الأقل. الإمساك وارد جدا في الفترة دي وممكن يتحل بالملينات. الرياضة 20 دقيقة في اليوم حتى لو مجرد مشي هتساعد جدا. المفروض الفترة دي الوزن بيقل كيلو واحد يوميا.

النظام ده يعتبر قاسي لكن سريع، مرحلة التثبيت لازم تتنفذ كاملة وإلا الوزن بيرجع زي ماكان وأكتر – لو حصل أي ألام في الكلي لازم استشارة الطبيب – يجب الحفاظ علي 3 وجبات رئيسية فطار وغدا وعشا, و لازم يكون في سناكس ف النص بحيث متفضلوش بدون أكل لمدة أكتر من خمس ساعات حفاظا على معدل الحرق و عشان الجسم ميدخلش في مرحلة المجاعة و يبدأ يخزن ومعدل الحرق يقل.

  • المرحلة التانية ( مرحلة العبور): هي المرحلة الي بنعتبر إن الدايت بدأ فيها فعلا. المعدل بيقل ممكن فقدان الوزن يوصل لكيلو واحد أسبوعيا. يسمح فيها بكل الأكل السابق مع إضافة ملعقة زيت زيتون و إدخال الخضار عدا الخضار النشوي زي البطاطس والبطاطا والقلقاس والبسلة وممنوع البقوليات زي العدس والفول. مسموح بالخيار والطماطم والجزر بس بحدود. السبانخ والكرنب والقرنبيط وورق العنب والباذنجان والكوسا والملوخية والبقدونس والشبت والكزبرة وممكن استعمال صلصة الطماطم ف الطهي. مدة المرحلة دي لحد ماتوصلوا للوزن المطلوب، بتتقسم الفترة دي لأيام بروتين فقط (زي المرحلة الأولى) وأيام بروتين مع خضروات. بتتعمل يوم بروتين و يوم خضروات أو يومين ويومين أو حتى خمس أيام وخمس أيام لحد الوصول للوزن المطلوب المهم إن أيام البروتين يتبعها نفس عدد أيام الخضار. مسموح في الفترة دي بتناول الفرانكفورتر والسوسيس، الرياضة لمدة نصف ساعة يوميا.

في حاجة متكلمتش عنها لأني متأكدة إنها مش موجودة ف مصر, هي نخالة الشوفان oat bran. دي الحاجة الوحيدة الي ممكن نعمل بيها خبز غير كدة ممنوع. ردة ممنوع شوفان أبيض ممنوع دقيق كامل ممنوع هي نخالة الشوفان دي بس. ممكن يتعمل بيها كريب أو بانكيك حلو.

 

  • خلاص وصلتوا للوزن اللي عاوزينه؟ نبدأ مرحلة التثبيت:

التثبيت بيكون 10 أيام عن كل كيلو نزل يعني لو المفقود 5 كيلو هيحتاجوا 50 يوم تثبيت. قد تبدو إنها فترة طويلة لكن ف الحقيقة هتكون أكل عادي جدا بس بنظام. الفترة دي هتقسموا الأسبوع كالآتي:

  1. يومين فري تاكلوا كل اللي عاوزينه بس يكون بينهم يومين علي الأقل يعني سبت و ثلاثاء مثلا. يومين بروتينات وخضار زي المرحلة الثانية
  2. . يومين وجبة متكاملة بروتين وخضار ونشويات زي الأرز 125 جرام أو المكرونة 200 جرام بس يكون مطبوخ بطريقة صحية بدون دهون ضارة. يوم واحد أسبوعيا بروتين فقط وبكده يبقي ضمنته إن الوزن الي نزل مش هيرجع بإذن الله، في مرحلة التثبيت في شوية حاجات مسموح بيها كل يوم زي: شريحتين توست أسمر, 40 جرام جبنة عادية مش خالية الدسم زي الشيدر أو الموزريلا, ثمرة فاكهة بحجم التفاحة بس ممنوع الموز والتين و العنب و الفواكه المجففة لأن كلها سكر والمكسرات ( يتاكلوا في الأيام الفري(.

بعد المرحلة دي هتعيشوا حياتكم عادي جدا مع الحفاظ على تناول البروتين فقط يوم واحد أسبوعيا للمحافظة علي ثبات الوزن مع محاولة اختيار طعام صحي.

ملاحظات عامة: النظام ده لايفضل اللجوء ليه إلا بعد استفاذ المحاولات مع أنظمة الدايت المتوازنة لأنه يعتبر نظام سريع و ينقصه الكثير من العناصر وممكن تناول الفيتامينات و المكملات الغذائية معه.

 

مواضيع أخري اخترناها لك:

تجربتي في انقاص وزني 20 كيلو في 4 أشهر!

 

NO COMMENTS

Leave a Reply