علّمتني صاحبتي…

علّمتني صاحبتي…

0 1863
علمتني صديقتي...
shareEmail this to someonePin on Pinterest0Share on Google+0Tweet about this on TwitterShare on Facebook0

.

 

أقوى الدروس إللى بنتعلّمها في الحياة هي أكثر الدروس واقعيّة. هي اللفتة البسيطة من صديقة وإللى بتغيّر كتير من شكل علاقتنا، ومن نظرتنا لكتير من أمور الحياة. هى الواقع إللى بعيد كل البُعد عن نظريّات الحياة إللى مكتوبة في الكتب. أجمل الدروس هي إللى بنتعلّمها من الأصحاب, يبهرك طريقة تفكير أحدهم, طريقة معالجتهم للحياة, أخلاقهم, طموحهم، إلخ… أوقع الدروس وأجملها، تلك التي نتعلّمها من الأصدقاء.

 

علّمتني صاحبتي إن الأرزاق على الله، وإن الأطفال رزق كبير ونعمة وفرحة قلب،  مينفعش مانفرحش بيها، بل بالعكس، داحنا نحافظ عليها. علّمتني صاحبتي إن سِن الـ ٣٠ مش بُعبُع، وإن قلبي في الـ ٣٠ زيُّه زي الـ ٢٠، قلب بسيط بشوية خبرة زايدة. علّمتني صاحبتي إزّاي أصلَّح من نفسي، علشان مش عيب أشوف عيوب نفسي، وأواجهها، وأكون أحسن لنفسي والآخرين.

 

علّمتني صاحبتي معنى التسامُح، عرّفتني إزّاي هي أجمل مِنّي من جوّه، وطاقة التسامُح والعفو عندها أكبر مِنّي بكتير. علّمتني صاحبتي إن كلمة (آسف) كلمة قوّة وعِزّة، مش كلمة ضعف وهوان. علّمتني صاحبتي معنى الجدعنة، والبنت إللى بـ ١٠٠ راجل. علّمتني صاحبتي يعني إيه التفاني ف أبسط الأشياء، وإتقانها وعملها بمنتهى الدقّة. علّمتني صاحبتي إن الرضا من أجمل الأحاسيس، والرضا بقضاء الله واجب، بالضحكة إللى تجبر القلب إنه يضحك مهما كانت الظروف.

 

علّمتني صاحبتي الكتمان، وإن السِرّ مكانه بيننا بس، ولا يمكن أبدًا مخلوق يعرفه. علّمتني صاحبتي إن الغُربة وجع، وإن الفُراق ممكن يهزّ الجبل، لكن هى صامدة، حتى لو فى يوم انهارت، هترجع تاني أقوى من الأول. علّمتني صاحبتي معنى التفاؤل، وإن بُكره إللى جاي جميل، وإن ورا الباب المقفول ورد وفُلّ وياسمين.

 

علّمتني صاحبتي يعني إيه سِتّ جدعة تشيل جوزها وقت الزنقة، وتكون دايمًا في ضهرُه سَنَد وعون. علّمتني صاحبتي الضحكة الحلوة. علّمتني صاحبتي إنها ممكن تكون مرأة مُستقِلّة ومش عيب ولا حرام. علّمتني صاحبتي الوفاء والإخلاص. علّمتني صاحبتي كتير.. ولسّه بتعلّمني..

 

الأصحاب من أجمل النِعَمْ إللى الإنسان بيكون محظوظ، لو ربّنا أعطاه صُحبة صالحة. فكّري اتعلّمتي إيه من صُحابك إنتي كمان، معاني كتير، دروس كتير، حب وتفاني، على الرغم إن أوقات كتير ممكن ننخدع في أصحاب، وحتى الأصحاب الخدعة دُوْل بنتعلّم منهُم درس برده كبير. كلامي عن الأصحاب إللى معدنهُم دهب ومعرفتهُم كنز. اعطي لنفسك دقائق بس فكّري، اتعلّمتي إيه من صُحابك إللى ماليين عليكي حياتك بهجة وحب وسعادة؟.. و اكتبيلي: “علّمتني صاحبتي”.

 

يمني جاد

 

 

مواضيع مختارة:

 

البحث عن صديقة

كيف تدعمين صديقتك في أزمتها؟

الصديق وقت الفرح

 

 

NO COMMENTS

Leave a Reply