حكاية وجوه مصرية

حكاية وجوه مصرية

مصر مصرية شخصية وجوه حوار لقاء
shareEmail this to someonePin on Pinterest0Share on Google+0Tweet about this on TwitterShare on Facebook0

.

أمينة منصور مؤسسة صفحة الفيس بوك كايرو كابشنز وهي مستوحاه من Humans Of New Yorkتعمل كمصورة محترفة بالأساس و لكنها قررت أن تفتح كاميراتها و تجوب شوارع القاهرة لتصور لنا أشخاصا يعيشون معنا و لكن لا نعلم عنهم أي شئ!

مصر مصرية شخصية وجوه حوار لقاء

  • بتآكل إيه؟
  • سندوتش فول أمي عملاه…
  • إيه أكتر حاجة بتحبها في أمك؟
  • طبخها…
  • بس كده؟
  • (يضحك)…..حاجة كمان، لما بتجبلي حقي لما العيال بيغلسوا عليا في الحتة.

 

مصر مصرية شخصية وجوه حوار لقاء

  • سرحانة وبتفكري في إيه؟
  • مش بفكر انا بتفرج علي العيال اللي هناك من فوق
  • بيعملوا إيه مخليكي مركزة كدة
  • بيروحوا المدرسة كل يوم

 

مصر مصرية شخصية وجوه حوار لقاء

  • عاوز تبقي ايه لما تكبر؟
  • جنيني
  • اشمعني؟
  • الحته كلها مباني رصاصي شكلها وحش اوي بس لما حد بيحط زرعه حتي لو صغيرة المكان بيتحول لحاجة جميلة.انا عاوز ازرع شجر وورد في كل حته علشان الناس تعيش في حاجة جميلة…

 

مصر مصرية شخصية وجوه حوار لقاء

(منشية ناصر)

  • ممكن اتكلم معاكي شوية؟
  • اه، بس بسرعة ، عندي حصة لازم احضرها
  • مش هأخرك …عاوزة تبقي ايه لما تكبري؟
  • الأسبوع اللي فات، الميس ورتنا موسوعة فيها صور كتير…حبيت اوي الجزء بتاع الفضاء ..انت عارفة ان رواد الفضاء بيطيروا ؟
  • ايوه
  • انا طول عمري نفسي اطير
  • بس انت عارفة ان الدنيا هادئة وفاضية فوق مش ذي القاهرة
  • ايوة بس ده احسن..القاهرة دائماً زحمة ودوشة….المشكلة الوحيدة ان امي هتخاف تبعتني فوق

 

 

 

 

مصر مصرية شخصية وجوه حوار لقاء

  • نفسك تبقي ايه لما تكبر؟
  • مش متأكد لو عاوز أكبر
  • ليه؟
  • نصف الكبار اللي أعرفهم وبشوفهم مش مبسوطين وعلي طول بيشتكوا من الشغل او الفلوس …أنا عاوز افضل العب وابقي مبسوط

 

مصر مصرية شخصية وجوه حوار لقاء

  • إيه اكتر حاجة بتخوفك؟
  • أني أروح الحمام
  • ليه؟
  • ده الحمام….. وعلشان أوصله لازم امشي بليل في الظلمة فبخاف وكمان بيكون فيه فئران كتير…و سعات لازم أفضل مستني كتير بره علشان كل الحتة بتستعمل نفس الحمام
  • لو في حاجة واحدة نفسك تتغير في حياتك هتختار ايه؟
  • نفسي أعيش في بيت عادي زي بتوع التلفزيون

 

مصر مصرية شخصية وجوه حوار لقاء

  • تفتكر شغل الواحد بيحدد شخصيته؟
  • الي حد ما…بس مش في كل المجالات…لو الواحد هو الي اختار شغله اه… بس في حالتي شغلي هو اللي اختارني…مكنش عندي حل تاني وأكل العيش بقي…بس شغلك بيحدد الطريقة اللي الناس بتشوفك بيها
  • والناس بتشوفك ازاي؟
  • اني جزار معنديش قلب وميحبوش يدخلوا معايا في مشاكل مع اني مش بتاع مشاكل
  • لو كان ممكن تختار شغلك كنت اخترت تبقي ايه
  • جنيني…بحب الخضرة والزرع …مستغربة صح؟ من خضرة لدم ..بس كلها الوان
  • ايه أصعب حاجة في شغلتك؟
  • أنك تبقي عارف أن معظم الناس عمرها ما كلت لحمة ..ميعرفوش طعمها يعرفوا شكلها بس

 

 

 

مصر مصرية شخصية وجوه حوار لقاء

  • كنتِ بتقولي ايه للبنت اللي واقفة الناحية التانية من الشارع؟
  • كنت بس عاوزة جنيه اشتري حاجة حلوة للعيد
  • ادوكي الفلوس؟
  • لأ… بس البت كانت بتوزع توك الشعر دي وادتني واحدة…شكلها حلو اوي عليا صح؟
  • اوي…لايقة عليكي جدا…زعلانه انهم مدوكيش الجنيه؟
  • لا ، الجنيه كنت هديه لأمي علشان تجبلنا اكل…دلوقتي عندي حاجة بتعتي ألبسها في العيد ومبسوطة بيها اكتر من الأكل…شكلي حلو

 

 

مصر مصرية شخصية وجوه حوار لقاء

  • ايه معني الإنبساط بالنسبة لكم؟
  • (الولد اللي علي اليمين) اننا نكون مع بعض
  • (الولد اللي علي الشمال) اننا نلعب مع بعض
  • انتو الإتنين قولتوا كلمة “مع بعض” تفتكروا ليه؟
  • (الولد اللي علي اليمين) أنتِ ممكن تلعبي و تتبسطي من غير صحابك؟
  • عندك حق

 

تصوير و حوار: أمينة منصور – كايرو كابشنز

 

[اقرئي أيضا: رحلتي الي الإسلام…عابدة ريتشي]

 

 

NO COMMENTS

Leave a Reply