حتى لا تكوني بطة! أفكار لتنمية ذاتك واستغلال وقتك

حتى لا تكوني بطة! أفكار لتنمية ذاتك واستغلال وقتك

6 9701
تنمية الذات واستغلال المهارات
تنمية الذات واستغلال المهارات
shareEmail this to someonePin on Pinterest0Share on Google+0Tweet about this on TwitterShare on Facebook0

 

دايما الست المصرية تشتكي من اللي حصلها بعد الزواج و خصوصا بعد الحمل وإنجاب الأطفال، وتقعد تستعيد الذكريات مع صاحباتها لما كانت وردة ورشيقة ونشيطة وشعرها تقيل وجميل و و و …. ، وبتبقي شايفة أن الدنيا مظلمة و صعب أنها ترجع الي فات و علي رأي اللي قال “عاوزنا نرجع زي زمان؟ .. قول للزمان ارجع يا زمان”، و الحقيقة أن أسلوب حياة الست المصرية هو السبب في التدهور ده! يعني مثلا

  1. الست بتضحي دائما عشان أسرتها و عشان أولادها وبتيجي علي نفسها وبتأخر احتياجاتها عشان بقية الأسرة وده شئ كويس لكن مينفعش يبقي أسلوب حياة ، لازم ومن حقك يبقي ليكي نصيب من وقتك لنفسك، حطي نفسك في الجدول وادي لنفسك أولوية، راحتك وصحتك مهمين.
  2. كتير من الستات مش بتهتم بأكلها ووزنها وممارسة الرياضة إلا لما الموضوع يخرج عن السيطرة وهدومها تصغر عليها ويبدأ جوزها يعلق، ساعتها بقي تضطر تفرغ وقت وجهد وفلوس عشان تروج الجيم وتروح لدكتورة دايت ، ولتفادي ده خصصي وقت يومي ولو بسيط لممارسة الرياضة ، وشجعي نفسك بفيديو أو برنامج رياضي في التلفزيون .
  3. كمان مش بنهتم بالفيتامينات بتاعتنا والكالسيوم سواء وأنتي حامل أو وأنتي بترضعي ومش بناخد بالنا إلا لما عضمنا ومفاصلنا تبدأ توجعنا و أسناننا تسوس و شعرنا يقع، وبرضو بناخد بالنا متأخر و نبدأ مرحلة علاج المشكلة بدلا من الوقاية.
  4. آآآآآآه من المظهر داخل البيت .. الست تتجوز من هنا وتبدأ تدريجيا تهمل في نفسها أدام جوزها وهدومها تبقى مبقعة أو لابسة بيجاما مش بتاعة بعضها…فضلا طبعا عن أنها تلبس لبس مهندم و هي في البيت ، خلي في روتين يومي للاهتمام بنفسك :
  5. 5 دقايق الصبح تصففي شعرك وتحطي كريم لوشك
  6. 5 دقايق زيهم قبل ما جوزك يرجع من الشغل تغسلي وشك وتصففي شعرك وتحطي ماكياج سريع ، وتلبسي لبس مهندم وظريف ، لو في وقت يبقى خدي دش سريييييع بدون ما تغسلي شعرك ولا تستخدمي ليفة ، دش في 5 دقايق .
  7. خصصي يوم في الأسبوع أو في الشهر حتى تروحي فيه للكوافير تعملي شعرك وتجددي في شكلك ، حاجات بسيطة هاتأثر في نفسيتك وعلى جوزك إن شاء الله بشكل إيجابي.
  8. في كتير من الستات بعد الجواز بتعتمد على جوزها اعتمادا كليا، ودا طبعا بيأثر على شخصيتها، مش بتعرف تأخذ قرار أو تتصرف في موقف لو اتعرضتله لوحدها ، وعشان تتفادي ده ركزي دايما في الحلول وشوفي جوزك بيتصرف ازاي واسألي عن أي حاجة مش واضحة بالنسبة لك ، بحيث أنك لما تتعرضي لموقف تبقي عارفة تتصرفي التصرف الصحيح.
  9. الإهمال في القراءة والاطلاع و حضور الكورسات والدورات ، و للأسف ده بيساعد جدا في تأكيد الصورة السلبية عن ست البيت أنها بطة! اتعودي تناقشي جوزك في أمور عامة في شئون الحياة وفي اهتماماته ، مايبقاش كلامكم بس عن البيت والأولاد والمصاريف ، وده طبعا يتطلب وعي ومتابعة منك ، في فكرة ظريفة مشجعة على القراءة وهي أنك تخصصي علبة كأنها حصالة مثلا وتحطي فيها مثلا 40 جنيه كل شهر توفريهم من مصروف البيت وكل شهر أوشهرين اشتريلك كتاب جديد ينمي ثقافتك ، على آخر السنة هتكوّني مكتبة خاصة بيكي، ممكن تعملي رف زجاجي خاص بيكي تحطي فيه كتبك ولو حد من الاولاد عايز كتاب لازم يستعيره منك بقواعد 🙂 ، كمان ممكن تعملي كورنر خاص بيكي حطي ترابيزة صغيرة مركونة عندك وحطي عليها مفرش حلو بحيث تبقى مكتب ليكي في أي جنب وخلي عليها الكتاب اللي بتقريه وأوراقك وتعدي تقري عليها ، ده هايديكي شعور بالخصوصية وهايشجع الأولاد يقلدوكي.
  10. سهلي على نفسك قراءة الورد اليومي أو مراجعة الحفظ ، فكرة (الاستاند) الحامل للمصحف يكون طويل وخفيف وتحطي فيه مصحف كبير وقلم تقلبي بيه فكرة رائعة هتسهل علينا كتير يبقى قدامنا واحنا بنذكر للولاد بنغديهم أو مثلا بتقومي برضاعة ابنك بدل ماتقعدي تبصي في الحيطة 🙂 ، كمان في تطبيق على الموبايل حلو أوي اسمه (وردك) بتحددي فيه مقدار وردك اليومي وهو كل يوم بيفكرك بالورد بتاعك ولو اتأخرتي يوم بيكتبلك أنك كده متأخرة يوم أو يومين ، فبتحاولي تصلحي التأخير ده ، حقيقي التطبيق ده مشجع جدا.
  11. بالنسبه للصلاة .. مشكلة إسدال الصلاة اللي بيتحدف في كل مكان وكل ماتيجي تصلي تقعدي تدوري عليه وتزعقي للأولاد، خلي عندك إسدالين .. إسدال للصلاة عطريه ولفيه جوه سجادة الصلاة مايخرجش منها إلاوقت الصلاة والإسدال التاني للاستعمال العادي البلكونة تفتحي الباب لحد وهكذا ، وممكن تضيفي سبحة للفة بتاعة إسدال الصلاة وتستغفري 20 مرة بعد كل صلاة يبقى كده 5صلوات في 20 ب 100 في اليوم.
  12. أباجوره صغيرة جنب سريرك وكتاب صغير في درج الكومودينو سميه كتاب قبل النوم واستبدلي تصفحك على الفيس بوك قبل النوم بقراءة كتاب ، وممكن تشجعي نفسك بأنك تسجلي خروج من تطبيق الفيس بوك على الموبايل أو تمسحيه خالص وتكتفي بالكمبيوتر بالنسبة للفيس بوك.
  13. شجعي نفسك على العبادات .. يعني لو بتكسلي تصلي السنن مثلا ممكن تصليها وانتي قاعدة فتاخدي نصف الثواب أحسن من أنه يروح كله ، بالنسبة لقيام الليل ممكن تصلي ركعتين بعد العشاء ولو بسور قصيرة ، المهم المواظبة.
  14. استغلي وقت وقوفك في المطبخ في سماع شئ مفيد ، إذاعة القرآن الكريم أو درس أو قرآن أو مراجعة وردك من حفظك ، أو حفظ أي شئ جديد لا تجديد له وقتا بتكرار جزء بسيط منه طوال الوقوف في المطبخ ، ويمكنك تحفيظ أولادك القرآن أو أي شئ بنفس الطريقة.
  15. افتكري دايما أن اهتمامك بنفسك وتنميتك لذاتك ولشخصيتك ولمهاراتك يؤثر على نفسيتك بشكل إيجابي ، ويؤثر طبعا على جوزك ، حاولي دايما ماتخليش ميزة في أي واحدة وإلا وتوفريها في نفسك قدر المستطاع ، كمان أولادك يحبوا دايما تكون أمهم متميزة دايما وكده بتزودي احترامهم ليكي واعتبارهم برأيك وكلامك.

مع تمنياتنا لكِ بحياة مشرقة دائما…

فريق عمل مج لاتيه بالتعاون مع بعض المتطوعات…

 

photo credit: Bigstock

 

6 COMMENTS

  1. المقال رااااااااااااااااااااااااائع جدااااا تسلم ايديكم وجزاكم الله خيرا
    ومن ضمن الاسباب برده ان جيرانها او سلايفها او حماتها يقولو عليها محنتفه
    فتعمل رد فعل عكسي
    ودايما بتربط ان مادام شكلى وحش ابان ست بيت شاطره
    ولو ظهرت دلوعه الناس هتقول عليا عايقه وماليش فى شغل البيت

     
  2. تحفاااا 🙂 بجد مكقال يضحك وظريف اوييي… انا فعلا مش عايزة اكون بطة ابدا….و اللي شايفة نفسها بطة تلحق قبل ما تضاف الي سلسلة المحمر والمشمر.
    بجد شكرا على المقال…اكثر من رائع

     

Leave a Reply